എച്ച്മുവോട് ഉലകം

(മെയ് 22 ലക്കത്തിലെ കേരളകൗമുദി വാരികയല്‍ പ്രസിദ്ധീകരിച്ചത്)


തമിഴ് ചുവയുള്ള ഈ ബ്ലോഗ് പേരാണ് എന്നെ കല.സി. എന്ന എച്ചുമുക്കുട്ടിയുടെ രചനകളിലെത്തിച്ചത്. അസാധാരണമായ ഈ ബ്ലോഗ് പേര് 'എന്നിലെ തമിഴു പട്ടരും മലയാളി ആശാരിയും തമ്മിലുള്ള നിത്യമായ ചൊറിച്ചിലിന്റെ ഒരു ബാക്കി പത്രമെന്ന നിലയിലാണ് ' എന്നു പറയുന്നു എച്ച്മു. 'തമിഴു പട്ടരുടെ അമ്മത്തവും മലയാളി ആശാരിയുടെ അച്ഛത്തവും എന്നെ തമിഴ് പട്ടരു കള്ളിയിലും മലയാളി ആശാരി കള്ളിയിലും പെടുത്തിയില്ല' എന്ന എച്ച്മുവിന്റെ സങ്കടം എന്റേതു കൂടിയായി. ജാതി-മത അടിയൊഴുക്കുകള്‍ മോഡേണ്‍ എന്ന് അഹങ്കരിക്കുന്ന സമൂഹത്തിലും എത്ര ശക്തമെന്ന് ഈ ബ്ലോഗ് എന്നെ ലജ്ജിപ്പിച്ചു.

'സ്വന്തം ഭര്‍ത്താവിന്റെയല്ലേ, സാരമില്ല' എന്ന കഥയും ജാതി പേരിലുള്ള പീഡനം തന്നെയാണ് കൈകാര്യം ചെയ്യുന്നത്. കേരളത്തില്‍ നടക്കുന്ന കഥ എന്ന രീതിയില്‍ വിഷയത്തിന് അല്‍പ്പം അവിശ്വസ്വനീയത തോന്നിയെങ്കിലും അവതരണ രീതിയും ഭാഷയും മികച്ച നിലവാരം പുലര്‍ത്തുന്നു. ഒറ്റയിരുപ്പിന് മുഴുവന്‍ വായിച്ചു തീര്‍ക്കും നമ്മള്‍.

ശക്തമാണ് എച്ച്മുവിന്റെ വാക്കുകള്‍. കുറിക്കു കൊള്ളുന്നവ. മതവൈരം ശമിപ്പിക്കുവാനുള്ള എച്ച്മുവിന്റെ 'ഒരു ഒറ്റമൂലി' വായിക്കൂ-

'ആ വിഷയം ചര്‍ച്ചക്കെടുത്താല്‍ എല്ലാവരും തമ്മില്‍ ഒന്നിനൊന്ന് മികച്ച ഐക്യമുണ്ടാകും. ആ ഭയങ്കര വിഷയമാണു നമ്മള്‍ പെണ്ണുങ്ങളെ പറ്റിയുള്ള കാര്യങ്ങള്‍. പെണ്ണ് ജനിക്കണോ വേണ്ട്യോ? വല്ലതും അക്ഷരം കൂട്ടിവായിക്കാന്‍ പഠിക്കണോ? കല്യാണം കഴിക്കണോ? ജോലിക്കു പോണോ? തന്തേടേം കെട്യോന്റേം സ്വത്തില് അവകാശം വേണോ? അമ്പലത്തിലും പള്ളീലും ഒക്കെ കേറി വല്ല പൂജ്യോ കുര്‍ബാന്യോ ഓത്തോ ഒക്കെ ചെയ്യണോ?പിന്നെ, നമ്മള് എന്തുടുക്കണം, എങ്ങനെ നടക്കണം, ആരോട് മിണ്ടണം, എന്ത് തിന്നണം, എന്ത് കുടിക്കണം ഈ പറഞ്ഞ പോലത്തെ വിഷയങ്ങള് മുമ്പോട്ടു വച്ച് എല്ലാ ജാതിമതക്കാരേം വിളിച്ച് ഒരു ചര്‍ച്ച സംഘടിപ്പിച്ച് നോക്ക്യേ. എം. എല്‍. എ. മാര്‍ക്കും എം. പി. മാര്‍ക്കും കാശ് കൂട്ടണ ബില്ല് മാത്രമല്ലെ നമ്മടെ നിയമസഭേലും ലോകസഭേലും ഒരു വഴക്കും ഇല്ലാണ്ട് ഭരണപ്രതിപക്ഷ ഐക്യത്തോടെ പാസ്സാവാറുള്ളൂ. അതുപോലെ കമ്പ്്്‌ലീറ്റ് ഐക്യത്തോടെ എല്ലാ മതങ്ങളും പെണ്ണുങ്ങളുടെ അവകാശങ്ങളിലും ചുമതലകളിലും ഒറ്റ, സിങ്കിള്‍ അഭിപ്രായത്തിലെത്തും. സംശ്യം വല്ലതും ഉണ്ടെങ്കില്‍ നമ്മക്ക് ചര്‍ച്ച സംഘടിപ്പിച്ച് നോക്കാം.'

'ബുദ്ധിയും സിദ്ധിയും' എന്ന എച്ച്മുവിന്റെ ആദ്യ പോസ്റ്റ് ഇങ്ങനെ-

'ഒറങ്ങിക്കെടക്കണ വയറ്റുകണ്ണിപ്പെണ്ണിനെ കളഞ്ഞിട്ടു ആണൊരുത്തനങ്ങട് വീടുവിട്ടു പോയാല്‍ ബുദ്ധനോ സിദ്ധനോ ഒക്കെ ആവാം. പെണ്ണൊരുത്തി ആരോഗ്യസാമിയായ ആണിനെ കളഞ്ഞിട്ടു വീടുവിട്ടു പോയാലും ബുദ്ധിയോ സിദ്ധിയോ ഒന്നുമാവില്ല. പകരം പെഴച്ചവള് ആകും. ആണ് പെഴക്കില്ലല്ലോ!പെഴക്കല് പെണ്ണിന് മുപ്പത്തിമൂന്നും അമ്പതുമല്ല, നൂറുശതമാനം സംവരണമാ. പെഴച്ചവളെന്ന പേരു കേള്‍ക്കാതെ ബുദ്ധിയോ സിദ്ധിയോ ആവണമെങ്കിലേ, സ്വീകരണമുറിയിലെ ബോണ്‍സായ് ആലിന്റെ ചോട്ടിലിരിക്കണം.'

കഥകള്‍ ധാരാളം എഴുതിയിട്ടിട്ടുണ്ട് എച്ച്മു. മാധവിക്കുട്ടിയെ ഏറെ ഇഷ്ടപ്പെട്ട് അവരുടെ അന്ത്യയാത്ര കാണാന്‍ റോഡരികില്‍ നഷ്ടബോധത്തേടെ നിന്ന എച്ച്മുവിന്റെ ചില കഥകള്‍ക്ക് അവരുടെ ശൈലിയുണ്ട്.

സാധാരണ 'ഞാന്‍ ' കഥ പറയുന്ന രീതി എനിക്കിഷ്ടമല്ല. എച്ച്മുവിന്റെ മിയ്ക്ക കഥകളിലും 'ഞാനു'ണ്ട്. എന്നിട്ടും എനിക്കത് ഇഷ്ടമായി. നമുക്കു ചുറ്റുമുള്ള കൊച്ചു ജീവിതത്തുണ്ടുകള്‍, പൊള്ളുന്ന അനുഭവങ്ങള്‍ ഇതെല്ലാം കഥയ്ക്കു വിഷയീഭവിക്കുന്നു. എല്ലാം നിന്ദിതരുടേയും പീഡിതരടേയും ദുഃഖിതരുടേയും കഥകള്‍. വായനക്കാരുടെ ഉള്ളുരുക്കുന്നവ, ചിന്തിപ്പിക്കുന്നവ. കഥയ്ക്ക് ഒരു സന്ദേശം ഒന്നും ആവശ്യമില്ല എന്നു പറയും. പക്ഷേ എച്ച്മുവിന്റെ കഥകളിലെല്ലാം ഒളിഞ്ഞിരിക്കുന്ന സന്ദേശമുണ്ട്. കരുണ, സ്‌നേഹം, ഹൃദയവിശാലത അങ്ങനെയെന്തെങ്കിലുമൊന്ന്. അതാണ് അതിന്റെ ആകര്‍ഷണീയത.

കൃസ്ത്യാനിയല്ലാത്ത നായികയെ ഉപേക്ഷിച്ച് അവളുടെ കുഞ്ഞിനെ സൂത്രത്തില്‍ കൃസ്ത്യാനിയായ അച്ഛനും വീട്ടുകാരും കൊണ്ടു പോകുന്നതിനെപ്പറ്റിയുള്ള ' തിരുപ്പിറവി ' എന്ന കഥ പറയുന്നത് ബൈബിള്‍ ഭാഷയിലാണ്. ആ കഥയില്‍ നിന്ന് ചില വരികള്‍-

'തിരുപ്പിറവിക്കു തലേന്നു പുലര്‍ച്ചെ അവന്‍(ഭര്‍ത്താവ്) സ്വന്തം അപ്പനമ്മമാരുടെ മന്ദിരത്തെ പ്രാപിച്ചു. മഹത്വമാര്‍ന്ന അവന്റെ ഭവനം എന്നെയോ സ്വാഗതം ചെയ്തില്ല. എന്നാല്‍ ഞാന്‍ പിറന്ന ഭവനമോ, എന്നെ പണിക്കാരുപേക്ഷിച്ച മൂലക്കല്ലു പോലെയും ദ്രവിച്ച തടി പോലെയും തള്ളിക്കളഞ്ഞിരു ന്നു. അക്കാലം അവന്റെ ബീജം എന്റെ ഉദരത്തില്‍ തുടിച്ചു കൊണ്ടിരുന്നു.'
്
'ദൈവത്തിന്റെ വിരലുകള്‍ ഗിറ്റാര്‍ വായിക്കുമ്പോള്‍' മനോഹരമായി ഗിറ്റാര്‍ വായിക്കുന്ന, ഒരു വിരൂപനായ മനുഷ്യന്റെ കഥയാണ്, അയാളുടെ നഷ്ടപ്രണയത്തിന്റേതും. കഥ വായിച്ചു തീരുമ്പോള്‍ മനം നിറയെ നന്മയുള്ള ആ മനുഷ്യന്റെ അകസൗന്ദര്യം നമ്മെ വല്ലാതെ സ്പര്‍ശിക്കും. ഇനിയുമുണ്ട് ഹൃദയഹാരിയായ കഥകള്‍ എച്ചുമുവിന്റെ ലോകത്തില്‍ ധാരാളം.

വായിക്കണ്ടേ എച്ച്മുവിന്റെ കഥകള്‍? ഇതാ ഇതിലേയൊന്നു പൊയി നോക്കൂ..... http://echmuvoduulakam.blogspot.com/