Saturday, May 26, 2012

മാലാഖമാരുടെ കണ്ണീര്‍

Varika Link-May 09,2012.
             


ദൈവത്തിന് എല്ലാവരുടേയും കാര്യങ്ങള്‍ നോക്കാന്‍ കഴിയാത്തതുകൊണ്ട് അവര്‍ അമ്മമാരെ സൃഷ്ടിച്ചു എന്നു ചൊല്ല്. അമ്മ മക്കളെ പരിചരിക്കുമ്പോ ഴും അതില്‍ എന്റെ രക്തം എന്നൊരു സ്വാര്‍ത്ഥത ഉണ്ട്. എന്നാല്‍ യാതൊരു ബന്ധവും സ്വന്തവും ഇല്ലാതിരുന്നിട്ടും നമ്മുടെ മുറിവു വച്ചു കെട്ടി, നമ്മെ ആശ്വസിപ്പിക്കുന്ന ഭൂമിയിലെ മാലാഖമാരായ നഴ്‌സുമാരുടെ ദുരിതം നമ്മുടേതും കൂടിയല്ലേ? അവര്‍ക്ക് ജീവിക്കാനുള്ള വേതനവും മെച്ചപ്പെട്ട ജീവിത സാഹചര്യങ്ങളും ഉറപ്പിക്കാന്‍ നമുക്കും ഉത്തരവാദിത്വമില്ലേ? ഉണ്ട്, ഒരിക്കലെങ്കിലും ആസ്പത്രിയില്‍ പോയിട്ടുള്ള, നഴ്‌സുമാരുടെ സേവനങ്ങള്‍ സ്വീകരിച്ചിട്ടുള്ള ഓരോരുത്തര്‍ക്കുമുണ്ട് ആ ബാദ്ധ്യത.  

സൈബര്‍ലോകത്തും ഇതേപ്പറ്റി ധാരാളം ചര്‍ച്ചകളും സംവാദങ്ങളും നടന്നു.
http://malayalanatu.com/index.php/-/1440-2012-03-25-07-56-04  ല്‍ 'നഴ്‌സുമാരുടെ സമരം വ്യാപിക്കുമ്പോള്‍ ' എന്ന ലേഖനത്തില്‍ നിന്ന് -

'ഉത്തരേന്‍ഡ്യന്‍ നഗരങ്ങളില്‍ നിന്ന് അമൃത വഴി ഒരു ചൂടു ചുഴലിക്കാറ്റ് കേരളത്തിലെ സ്വകാര്യമേഖലയിലെ ആശുപത്രി വരാന്തകളിലേക്ക് പടര്‍ന്നു കയറുകയാണ്.....സ്വയം സംഘടിച്ച് ഇവര്‍ നടത്തുന്ന സമരം കേരളത്തിന്റെ ്‌തൊഴിലാളി ചരിത്രത്തിലും സ്ത്രീ മുന്നേറ്റങ്ങളുടെ ചരിത്രത്തിലും ഒരു പു തിയ അധ്യായം തുറന്നിരിക്കുകയാണ്......(അതെ, തീര്‍ച്ചയായും ഇതൊരു വനിതാ മുന്നേറ്റം തന്നെയാണ്-ലേഖിക)

ലോകത്തിന്റെ വിവിധഭാഗങ്ങളിലേക്ക് നഴ്‌സുമാരെ സംഭാവന ചെയ്യുന്ന ഒരു പ്രദേശം എന്ന നിലയില്‍, നഴ്‌സുമാര്‍ ഒന്നടങ്കം ആശുപത്രി ഭേദമില്ലാത്ത ഈ സമരത്തോട്  ഐക്യപ്പെടുന്നത്  അവര്‍ നേരിടുന്ന പ്രശ്‌നങ്ങളുടെ രൂക്ഷതയാണു വെളിവാക്കുന്നത്.'

കേരളജനമനഃസാക്ഷി ഒന്നടങ്കം സമരം ചെയ്യുന്ന മാലാഖമാര്‍ക്കൊപ്പം ഉണ്ടായിട്ടും ഒന്നും സംഭവിക്കുന്നില്ല, എന്തൊക്കെയോ കോക്കസുകളില്‍ പെട്ട് അവരുടെ പ്രശ്‌നങ്ങള്‍ ഇപ്പോഴും അപരിഹൃതമായി പുകയുകയാണ്. താത്ക്കാലികമായി പരിഹരിച്ചും പിന്നെയും സമരം ചെയ്തും പിന്നെയും പരിഹരിച്ചും അങ്ങനെയങ്ങനെ പുകഞ്ഞുനീറി നീറി...ശ്വാശ്വതപരിഹാരം എത്ര കാതം അകലെയാണാവോ?

നഴ്‌സിങ് സമരത്തെപ്പറ്റിയുള്ള പ്രിയ.ജിയുടെ ഏപ്രില്‍ മൂന്നിലെ ഗൂഗിള്‍ പ്ലസ് ചര്‍ച്ചയില്‍ ഉന്നയിക്കപ്പെട്ട വളരെ പ്രസക്തമായ ചില ആശങ്കകള്‍- സമരക്കാരിലെ ഭൂരിപക്ഷം വനിതകളാണ്, അപ്പോള്‍ പിന്നെ വനിതാകമ്മീഷന് സ്വയമേവ ഇതില്‍ ഇടപെട്ടുകൂടെ?  നഴ്‌സുമാരുടെ ദുരിതങ്ങള്‍ സാമൂഹികപ്രശ്‌നമായി മാറിയ സാഹചര്യത്തില്‍ സര്‍ക്കാരുകള്‍ ഇടപെടണമെന്ന് സുപ്രീം കോടതി നിര്‍ദേശിച്ചു. നഴ്‌സുമാരുടെ പ്രശ്‌നങ്ങള്‍ പഠിക്കാന്‍ നിയോഗിക്കപ്പെ ട്ട ഡോ. എസ് ബലരാമന്‍ കമ്മിറ്റി ഗുരുതരമായ മനുഷ്യാവാകാശ ലംഘന ങ്ങള്‍ ഈ മേഖലയില്‍ നടക്കുന്നുണ്ടെന്ന് വെളിപ്പെടുത്തുകയും ചെയ്തു. ഇതില്‍ സര്‍ക്കാരുകളുടെ സമീപനം എങ്ങനെയാണ് ? ഇത് സൈബര്‍സ്‌പേസിലുള്ളവരുടെ മാത്രമല്ല, നമ്മുടെയെല്ലാം മനസ്സിലുയരുന്ന, ദുരീകരിക്കപ്പെടേണ്ട സംശയങ്ങളത്രേ.

വിദേശത്ത്  ഇവിടുത്തേതിനേക്കാള്‍ നല്ല സേവനവേതന വ്യവസ്ഥക ളുള്ളതിനാല്‍ മിയ്ക്ക നഴ്‌സുമാരും അവിടേക്കു പോകുവാന്‍ ആഗ്രഹിക്കുന്നവരാണ്. എന്നാല്‍ അതിനുള്ള റിക്രൂട്ടിംഗ് ഏജന്‍സികള്‍ക്ക് രാജ്യമനുസരിച്ച് ലക്ഷ ങ്ങള്‍ കൊടുക്കേണ്ടി വരും. പഠനത്തിനു തന്നെ കടം കൊണ്ടവര്‍ക്ക് ജോലിയില്‍ നിന്നു കിട്ടുന്ന തുച്ഛവരുമാനം സ്വന്തം ചെലവിനു പോലും തികയാത്ത സാഹചര്യത്തില്‍ വിദേശജോലിക്കെന്നു വീണ്ടും കടം എടുക്കാന്‍ എത്ര പേര്‍ക്കു കഴിയും?

ഇനി 'ദീപമേന്തിയ വനിത 'യെ കുറിച്ച്. 1860 ല്‍ ലണ്ടനിലെ സെന്റ്.തോമസ് ആശുപത്രിയില്‍ ലോകത്തിലെ ആദ്യത്തെ മതേതര നഴ്‌സിംഗ് സ്‌കൂള്‍ തുട ങ്ങിയ ഫ്‌ളോറന്‍സ് നൈറ്റിംഗേല്‍ ആണ് ആ മഹതി. ഉയര്‍ന്ന ജീവിതസാഹചര്യങ്ങള്‍ ഉപേക്ഷിച്ച് മുറിവേറ്റവരെ ശുശ്രൂഷിക്കുന്നത് തന്റെ ദൈവനിയോഗമാണെന്നു കണക്കാക്കിയ അവര്‍ ഒരു നഴ്‌സ് മാത്രമായിരുന്നില്ല, ഒരു എഴുത്തുകാരിയും സ്ഥിതിവിവരശാസ്ത്ര നിപുണയും (Statistician) കൂടി ആയിരുന്നു. ക്രിമിയന്‍ യുദ്ധത്തില്‍ പരിക്കേറ്റ പട്ടാളക്കാരെ ശുശ്രൂഷിക്കലായിരുന്നു അവര്‍ സ്വയം ഏറ്റെടുത്ത ആദ്യദൗത്യം.

' ഈ ദുരിതകുടീരത്തില്‍
 നിറംകെട്ട വിഷാദമൂകതയിലൂടെ
ദീപമേന്തിയ വനിത.
അവര്‍ കടന്നുപോകുന്നതും
മുറിയില്‍ നിന്നു മുറിയിലേക്ക്
തെന്നി നീങ്ങുന്നതും
ഞാനിതാ കാണുന്നഹോ!

(H.W.ലോംഗ്‌ഫെലോ 1857 ല്‍ എഴുതിയ സാന്റാ ഫിലോമിന എന്ന കവിതയില്‍ നിന്ന്). ടൈംസ് പത്രത്തില്‍ വന്ന വാര്‍ത്ത അവര്‍ക്ക് ദീപമേന്തിയ വനിത എന്ന പേരു നേടിക്കോടുത്തപ്പോള്‍ ഈ കവിത ആ പേര് ഒന്നു കൂടി വ്യാപകമാക്കി. അവരുടെ ശബ്ദത്തിലുള്ള സന്ദേശം ബ്രിട്ടനിലെ ശബ്ദലൈബ്രറിയിലുണ്ട്.  കൂടുതല്‍ അറിയാന്‍ http://en.wikipedia.org/wiki/Florence_Nightingale വായിക്കാം.

Wednesday, May 23, 2012

ആരാണ് ബാലചന്ദ്ര അപ്പാസ്വാമി ?

Varika link


ഇന്ന്, ഈ കോളം മൂന്നാം വര്‍ഷത്തിലേക്കു കടക്കുന്ന ദിനത്തില്‍, ജീവിതത്തിന്റെ ലളിതവശങ്ങള്‍ കാണിച്ചു തരുന്നൊരു തമാശ ഫോര്‍വേഡഡ് മെയിലിന്റെ സ്വതന്ത്രപരിഭാഷയാവട്ടെ. ഉത്ഭവം 'ദില്‍ സേ ദേശി' കൂട്ടായ്മ.

-ഓഫീസിലെ ഉച്ചഭക്ഷണ ഇടവേള. രാജഗോപാലും ശങ്കറും കൊച്ചുവര്‍ത്തമാനം പറയുകയായിരുന്നു.

രാജഗോപാല്‍-ഇവിടെ കയറിയ അന്നു മുതല്‍ ഞാന്‍ എന്നും ഓഫീസ് സമയത്തിനു ശേഷവും വളരെ വൈകും വരെ ജോലി ചെയ്യാറുണ്ട്. അതുകൊണ്ട് എനിക്കു ഇക്കൊല്ലം നല്ല ബോണസും ഉദ്യോഗക്കയറ്റവും കിട്ടി

ശങ്കര്‍-അതെങ്ങനെ രാജ്? അതു മാത്രമാണോ അതിന്റെ പിന്നിലെ രഹസ്യം?

രാജ്-അല്ല, ഓഫീസ് സമയത്തിനു ശേഷം ഇവിടെ നില്‍ക്കുന്നതിനിടയില്‍ ഞാന്‍ ധാരാളം പൊതുവിജ്ഞാനം നേടി. എന്റെ പ്രവര്‍ത്തന വിലയിരുത്തല്‍ (അപ്രൈസല്‍) സമയത്ത് ബോസ് അത്തരം ചോദ്യങ്ങള്‍ ചോദിച്ചിരുന്നു.

ശങ്കര്‍-ഒരു ഉദാഹരണം?

രാജ്-അതായത്, ഒരു ഉദാഹരണത്തിന്, ആരാണ് ഗ്രഹാം ബെല്‍? അതു നിനക്കറിയുമോ?

ശങ്കര്‍-ഇല്ല

രാജ്-1876 ല്‍ ഫോണ്‍ കണ്ടുപിടിച്ച ആളാണ് അദ്ദേഹം. ഓഫീസ് സമയം കഴിഞ്ഞ് കൂടുതല്‍ നേരം ഓഫീസില്‍ ചെലവഴിച്ചിരുന്നെങ്കില്‍ നിനക്കിതു അറിയാന്‍ കഴിഞ്ഞേനേ.

പിറ്റേന്നു ഉച്ചയ്ക്കും ഇതേ ചര്‍ച്ച തുടര്‍ന്നു.

രാജ് - അലക്‌സാണ്ടര്‍ ഡ്യൂമാ ആരെന്നു നിനക്കറിയാമോ?

ശങ്കര്‍-ഇല്ല.

രാജ്- ത്രീ മസ്‌കിറ്റിയേഴ്‌സ് എഴുതിയ ആളാണ് അദ്ദേഹം. ഓഫീസ് സമയത്തിനു ശേഷം കൂടുതല്‍ നേരം ഓഫീസില്‍ ചെലവഴിച്ചിരുന്നെങ്കില്‍ നീ ഇത് അറിഞ്ഞേനെ.!

അടുത്ത ദിവസം വീണ്ടും ഇതു തന്നെ.

രാജ്-ഷങ് ജാക്ക് റുസോ ആരെന്നു നിനക്കറിയുമോ?

ശങ്കര്‍-ഇല്ല

രാജ്- 'കണ്‍ഫഷന്‍സ്' എഴുതിയ ആള്‍ ആണ് അദ്ദേഹം. ഓഫീസ് സമയം കഴിഞ്ഞ് കൂടുതല്‍ നേരം ഓഫീസില്‍ ചെലവഴിച്ചിരുന്നെങ്കില്‍ നിനക്കിതെല്ലാം അറിയാന്‍ കഴിയുമായിരുന്നു!

ഇപ്രാവശ്യം ശങ്കറിനു ക്ഷമ നശിച്ചു. അയാള്‍ ചോദിച്ചു:

' ആരാണ് ബാലചന്ദ്ര അപ്പാസ്വാമി എന്നു നിനക്കറിയുമോ ?'

രാജ്-ഇല്ല

ശങ്കര്‍- എല്ലാ വൈകുന്നേരങ്ങളിലും നിന്റെ ഭാര്യക്കൊപ്പം ചുറ്റിയടിക്കുന്ന ആളാണ് അയാള്‍. ഓഫീസ് സമയം കഴിഞ്ഞ് കൂടുതല്‍ നേരം ഓഫീസിലിരിക്കുന്ന രീതി നീ നിര്‍ത്തിയിരുന്നെങ്കില്‍ ഇത് നീ എന്നേ അറിയുമായിരുുന്നു.

ഗുണപാഠം- ജോലിയേക്കാളും പൊതുവിജ്ഞാനത്തേക്കാളും പ്രധാനപ്പെട്ട പലതും ജീവിതത്തിലുണ്ട്. ജീവിതം ആസ്വദിക്കുക!-ഈ പാഠം ഞാനും വൈകിയാണ് പഠിച്ചത്.

പണിയെടുത്തിരുന്ന ഓഫീസിന് വീടിനോളമോ അതിലധികമോ പ്രാധാന്യം കൊടുത്തിരുന്ന കാലത്തെ ഒരു ഓര്‍മ്മ-

കമ്പനി നിര്‍മ്മിക്കുന്ന ഉല്‍പ്പന്നങ്ങളുടെ ഗുണമേന്മ നിര്‍ണ്ണയിക്കുന്ന ക്വാളിറ്റി കണ്ട്രോള്‍ വകുപ്പിന്റെ തലവി ആയിരിക്കും കാലം. എപ്പോഴും മറ്റുള്ളവരെപ്പറ്റി തമാശ പറയുന്ന സരസനായ ഒരു സഹഉദ്യോഗസ്ഥന്റെ കളിയാക്കല്‍ ഇങ്ങനെ- ' മാഡത്തിന്റെ  ജോലി എന്തെന്നറിയുമോ? യാതൊരു കാരണവശാലും ഗുണനിലവാരം ഉയരാതെ 'ക്വാളിറ്റി ' കണ്ട്രോളു ചെയ്തു നിലനിര്‍ത്തുക. നിലവാരം എങ്ങാനും ഉയരുന്നെന്നു കണ്ടാല്‍ ഉടന്‍ മാഡം ചാടിവീഴും അതു പഴയപോലെ ആക്കി കണ്ട്രോളു ചെയ്യാന്‍.!'




Friday, May 18, 2012

സ്വയം സഹായം മാത്രം

Varika link                        
(18.04.12 ലേക്ക്)
'ചേച്ചീ, എന്നെ അറിയില്ലേ?ഇവിടുത്തെ അമ്മയ്ക്കും സാറിനും എല്ലാം ഞങ്ങളെ നന്നായറിയും......ആളിന്റെ മോളാണ്. അച്ഛന്‍ പറഞ്ഞുവിട്ടതാണ്, കുറച്ചു പൈസയ്ക്ക്.....' വീട്ടില്‍ മറ്റാരുമില്ലാത്ത സമയം, കാഴ്ച്ചയില്‍ നല്ല ആരോഗ്യം തോന്നിപ്പിക്കുന്ന ഒരു ചെറുപ്പക്കാരിയായിരുന്നു അവര്‍. ഇത് തട്ടിപ്പാണെന്ന് മനസ്സു പറഞ്ഞുകൊണ്ടേയിരുന്നു, പക്ഷേ, എങ്ങാനും ശരിയാണെങ്കിലോ, വീട്ടിലെ പഴയ ആശ്രിതനാണെങ്കിലോ. പണം കൊടുത്തു. അവരുടെ മുഖം മനസ്സില്‍ നന്നായി വരഞ്ഞുമിട്ടു. 


എല്ലാവരും വീടണഞ്ഞപ്പോള്‍ മനസ്സിലായി, ശരിക്കും പറ്റിക്കപ്പെട്ടു എന്ന്. ഏതാണ്ട് ഒരു കൊല്ലം കഴിഞ്ഞ് അവര്‍ വീണ്ടും വന്നു, മറ്റൊരു കഥയുമായി. നേരത്തേ അവര്‍ അവിടെ വന്നിട്ടേയില്ല പോലും! നമ്മുടെ മറവി മുതലെടുക്കാമെന്നു കരുതിയിട്ടുണ്ടാവും. എന്തായാലും ഒറ്റ നോട്ടത്തില്‍ അവരെ തിരിച്ചറിഞ്ഞു, ശേഷം നടന്നത് ചിന്ത്യം!


ഇങ്ങനെ മെയ്യനങ്ങാതെ ചുളുവില്‍ ജീവിക്കുന്നവരുള്ളിടത്ത്, ദേഹം തളര്‍ന്നിട്ടും വായ് കൊണ്ടും കാലു കൊണ്ടും ചിത്രങ്ങള്‍ വരച്ച് വിറ്റ് ആ പൈസ കൊണ്ടു ജീവിക്കുന്നവരുടെ ഒരു കൂട്ടായ്മയുണ്ട്, അതാണ് http://www.imfpa.co.in/ . Mouth and Foot Painting Artists (MFPA) യുടെ ഇന്‍ഡ്യന്‍ ഘടകമാണ് ഇത്. സൈറ്റില്‍ അവര്‍ വരച്ച ചിത്രങ്ങള്‍ ഓരോന്നായി മിന്നി മറഞ്ഞുകൊണ്ടിരിക്കും. 


പോളിയോ ബാധിച്ച്,  വായ കൊണ്ടു ചിത്രം വരച്ചിരുന്ന ഈറിഷ് സ്റ്റിഗമാന്‍ 1956 ല്‍ എട്ടു യൂറോപ്യന്‍ രാജ്യങ്ങളില്‍ നിന്നുള്ള ഇത്തരം കലാകാരന്മാരുടെ ഒരു കൊച്ചു കൂട്ടായ്മയുണ്ടാക്കി. അവരുടെ കലാപരമായ ശ്രമങ്ങളിലൂടെ ജോലി സ്ഥിരത ഉറപ്പാക്കുകയായിരുന്നു ലക്ഷ്യം. അങ്ങനെ ചെറിയ തോതില്‍ തുടങ്ങിയ ആ കൂട്ടായ്മയില്‍ ഇന്ന് 74 രാജ്യങ്ങളില്‍ നിന്നുള്ള 700 അംഗങ്ങളുണ്ട്. അതിലെ അംഗങ്ങള്‍ അംഗവൈകല്യമുള്ളവരായതുകൊണ്ടു മാത്രം അവരെ ചാരിറ്റി സംഘടന എന്ന് ലേബല്‍ ചെയ്യരുത് എന്നായിരുന്നു സ്റ്റിഗ്മന്റെ ആഗ്രഹം. സഹതാപം എന്ന വാക്കു പോലെ തന്നെ വെറുക്കപ്പെട്ടതായിരുന്നു അദ്ദേഹത്തിന് ദീനാനുകമ്പ എന്ന വാക്കും. 


'സ്വയം സഹായം മതി, ദീനാനുകമ്പ വേണ്ട   ' എന്നതാണ് സംഘടനയുടെ  ആപ്തവാക്യം. ചാരിറ്റി ആക്ട് പ്രകാരം രജിസ്ടര്‍ ചെയ്തിരിക്കുന്ന, പരസഹായത്തിനുള്ള ധാരാളം സംഘടനകളുണ്ട്, പക്ഷേ മിയ്ക്കവയും സംഭാവന പിരിവു തന്നെ. അങ്ങനെയുള്ളവരുടെ ഇടയില്‍ 'തളര്‍ച്ച ശരീരത്തിനേയുള്ളു, മനോഭാവത്തിലില്ല' എന്നു വിളിച്ചു പറയുന്ന ഇവര്‍ തികച്ചും വ്യത്യസ്ഥര്‍!    


കാലു കൊണ്ടു പടം വരയ്ക്കുന്ന പോത്താനിക്കാടുകാരി സ്വപ്‌നാ അഗസ്റ്റിന്‍, വായ കൊണ്ടു വരയ്ക്കുന്നവരായ  മലപ്പുറംകാരന്‍ ജെസ്ഫര്‍ പുളിക്കത്തൊടി, സുനിത തൃപ്പാനിക്കര എന്നിവരാണ് ഈ 16 ചിത്രംവരയ്ക്കല്‍കാരുടെ ഇന്‍ഡ്യന്‍ കൂട്ടായ്മയിലെ മലയാളി സാന്നിദ്ധ്യം എന്നു തോന്നുന്നു. സൈറ്റില്‍ ഇവരെക്കുറിച്ചുള്ള വിവരണം, ഫോട്ടോ, വീഡിയോ എന്നിവയുണ്ട്. ചിത്രങ്ങള്‍, ബാഗുകള്‍, ടീഷര്‍ട്ടുകള്‍, കലണ്ടറുകള്‍, കാര്‍ഡുകള്‍ തുടങ്ങിയവയെല്ലാമാണ് ഇവരുടെ ഉല്‍പ്പന്നങ്ങള്‍. അവയെല്ലാം വിശദമായി കണ്ട്് ഇഷ്ടപ്പെട്ടവ വാങ്ങി അവരെ പ്രോത്സാഹിപ്പിക്കാം. അങ്ങനെ ജോലി ചെയ്തു ജീവിക്കാനുള്ള അവരുടെ ന്യായമായ ആഗ്രഹം സാധിപ്പിച്ചുകൊടുക്കുന്നതിന് അവരെ സഹായിക്കാനാകും. 


ഇനി ചില ജീവിതചിത്രങ്ങള്‍, നടന്ന സംഭവങ്ങള്‍ എന്നു കുഞ്ഞുന്നാളില്‍ കേട്ടത്. 


1.നാട്ടുമ്പുറത്തെ പഴയകാല സ്‌കൂളിലെ രണ്ടാം ക്ലാസ്സ്.


സാര്‍-കുമ്പളങ്ങ കണ്ടിട്ടുണ്ടോ?
കുട്ടികളുടെ കോറസ്-ഉണ്ട്.
സാര്‍-വീട്ടില്‍ കുമ്പളങ്ങ ഉള്ളവര്‍ എഴുന്നേറ്റു നില്‍ക്കുക . 
കുറേ പേര്‍ എണീറ്റു നിന്നു.
സാര്‍-ആ,  നാളെ വരുമ്പോള്‍ എല്ലാവരും ഓരോ കുമ്പളങ്ങ ഇങ്ങു കൊണ്ടു പോരൂ!
കുറച്ചു നാളത്തേക്ക് സാറിന് മോരുകറിയും കിച്ചടിയും ഓലനുമെല്ലാം സുഭിക്ഷം!


2..അന്യനാട്ടുകാരനായതിനാല്‍ സാര്‍ ഒരു വീട്ടുകാര്‍ക്കൊപ്പമാണ് താമസം. വീട്ടില്‍ ആദ്യമായി ടേപ്പ് റെക്കാഡര്‍ വാങ്ങി. ഓരോരുത്തരോടും എന്തെങ്കിലും പറഞ്ഞുകൊള്ളാന്‍ പറഞ്ഞു. അതു തിരിച്ചു കേള്‍പ്പിച്ചു കൊടുത്ത് അത്ഭുതപ്പെടുത്തും. കുട്ടികള്‍ കവിത ചൊല്ലി, പാട്ടു പാടി. പക്ഷേ  റെക്കോഡ് ചെയ്യാന്‍ സാര്‍ പറഞ്ഞതിങ്ങനെ-


'ഉണ്ണീ, എനിക്കൊരു മുണ്ടു വേണം!  ' പിറ്റേന്നു തന്നെ മുണ്ടു കിട്ടി. അവസരങ്ങള്‍ ഉപയോഗപ്പെടുത്താനും വേണം കഴിവ്!





Saturday, April 14, 2012

വേനല്‍പൂട്ട്

varika link
                         
ഏജന്റുമാരുടെ സമരം മൂലം നിലച്ചു പോയ പത്രവായന പുനരാംരംഭിച്ചത് ഏപ്രില്‍ ഒന്നാം തീയതി മുതല്‍. വന്നപ്പോഴോ, ഓരോ പത്രത്തിനൊപ്പവും ്‌നോട്ടീസുകള്‍. അവധിക്കാല കമ്പ്യൂട്ടര്‍ കോഴ്‌സുകളുടെ പരസ്യങ്ങളാണ് അധികവും. പിന്നെ വാദ്യനൃത്തസംഗീതപരിശീലകരുടെ വക വാഗ്ദാനങ്ങള്‍ അതു വേറേ. എല്ലാം കുട്ടികളെ ലക്ഷ്യം വച്ച്, അവരുടെ അച്ഛനമ്മമാരുടെ കയ്യിലെ കാശ് ലക്ഷ്യം വച്ച്. മാതാപിതാക്കള്‍ ജോലിക്കു പോകുന്ന വീടുകളില്‍ കുട്ടികളെ വീട്ടില്‍ തനിച്ചാക്കുന്നതിലുള്ള സുരക്ഷിതത്വമില്ലായ്മ മൂലം പലരും കുട്ടികളെ  ബാലഭവന്‍ പോലുള്ള  ഇടങ്ങളില്‍ അയയ്ക്കുന്നു. പക്ഷേ എല്ലാവര്‍ക്കും ഈ സൗകര്യം ലഭിക്കില്ലല്ലോ.

വേനല്‍പൂട്ടിന് അപ്പൂപ്പനും അമ്മൂമ്മയ്ക്കുമൊപ്പം, കസിന്‍സിനൊപ്പം, പോയി താമസിച്ച് വെയിലത്തു കളിച്ച്, വേനല്‍മഴ നനഞ്ഞ്, അവധി ആസ്വദിക്കുന്ന രീതി അന്യം നിന്നു കഴിഞ്ഞു. അതിനി തിരിച്ചു വരില്ല. ദീര്‍ഘനിശ്വാസത്തിനു പ്രസക്തിയില്ല, കാരണം അതു കാലത്തിന്റെ മാറ്റം എന്ന് നമ്മള്‍ ക്ഷണിച്ചു വരുത്തിയ നമ്മുടെ നിയോഗമത്രേ.

കമ്പ്യൂട്ടര്‍ ക്ലാസ്സുകള്‍ അവിടെ നില്‍ക്കട്ടെ. ക്ലാസ്സിലും തന്നത്താനും ഇഷ്ടം പോലെ പഠിക്കുന്നുണ്ടല്ലോ, അതുമതി. എന്തായാലും ഒരു ചെറിയ യാത്രയെങ്കിലും തരപ്പെടുത്തിയല്ലേ, പറ്റൂ, ഇപ്രാവശ്യം അതില്‍ ഒരു വ്യത്യസ്ഥത ആയാലോ? തീം പാര്‍ക്കിനു പകരം സര്‍ഗ്ഗാലയയിലെ ചില്‍ഡ്രണ്‍സ് കോര്‍ണറില്‍ ഒന്നു പോയാലോ?

സര്‍ക്കാരിന്റെ ടൂറിസ്റ്റ് കരകൗശല-്രവിനോദസഞ്ചാരഗ്രാമമാണ് ഇരിങ്ങലിലുള്ള സര്‍ഗ്ഗാലയ-http://www.sargaalaya.com/ . അവിടെ കുട്ടികള്‍ക്ക് കളിക്കാനുള്ള സൗകര്യം ഉണ്ടെന്നും അവരുടെ കഴിവുകള്‍ വികസിപ്പിക്കാനും രസിക്കാനും ഉതകുന്ന തരം കരകൗശലപണികള്‍ സ്വയം ചെയ്യാന്‍ സഹായിക്കുന്നു എന്നും സൈറ്റ് പറയുന്നു. നമ്മുടെ തനതു കരകൗശലവസ്തുക്കള്‍ രൂപപ്പെടുന്നത് നേരില്‍ കാണാം, അതു പണിയുന്നവരുമായി സംവദിക്കാം, ഇഷ്ടപ്പെട്ടവ വാങ്ങി അവരെ പ്രോത്സാഹിപ്പിക്കാം എന്ന് സൈറ്റിലെ 'ക്രാഫ്റ്റ് ടൂര്‍' പറയുന്നു. കമ്പ്യൂട്ടറിലല്ലാതെ  വിയര്‍പ്പൊഴുക്കി  കൈകൊണ്ടു പണിയുന്നവരുമുണ്ട്, അവര്‍ നമ്മുടെ സംസ്‌ക്ൃതിയുടെ ഭാഗമാണ് എന്നു കൂടി കുഞ്ഞുങ്ങള്‍ മനസ്സിലാക്കേണ്ടതുണ്ട്.

നമ്മുടെ തച്ചോളി ഒതേനന്റെ നാടായ വടകരയ്ക്കടുത്താണ് ഈ കരകൗശല ഗ്രാമം. ലോകനാര്‍ കാവും, ഉണ്ണിയാര്‍ച്ച അങ്കം വെട്ടി ജയിച്ച നാദാപുരത്തങ്ങാടിയും മറ്റും ഒന്നു കാണണ്ടേ?വടക്കന്‍പാട്ടു മൂളി  ആ കാവും, കുങ്കിയമ്മ കുളിച്ച കുളവും മറ്റും വിസ്മയം നിറഞ്ഞ കണ്ണുകളോടെ പണ്ടു സന്ദര്‍ശിച്ചതിന്റെ ഓര്‍മ്മ ഇപ്പോഴും മനസ്സിലുണ്ട്. വടകരക്കാരനായ ഒരാള്‍ ഓഫീസില്‍ ജോലിക്കു ചേര്‍ന്നപ്പോള്‍, ഇതേപ്പറ്റിയെല്ലാം ആവേശത്തോടെ ചോദിച്ചതും അറിയില്ലെന്ന് അയാള്‍ കണ്ണുമിഴിച്ചതും മറ്റൊരു രസകരമായ ഓര്‍മ്മ.

മൂന്നു മണിക്കൂര്‍ ബോട്ടില്‍ യാത്ര ചെയ്ത് വെള്ളിയാങ്കല്ലിലും പോകാമത്രേ. മയ്യഴിപ്പുഴയുടെ തീരങ്ങളിലെ വെള്ളിയാങ്കല്ലു തന്നെയാണോ ആവോ? അവിടെ പ്രണയികളുടെ ആത്മാക്കള്‍ തുമ്പികളായി പറന്നു നടക്കുന്നത് കാണാനാവുമോ എന്തോ? വെള്ളായാങ്കല്ല്, ആ പേരിനു തന്നെ എന്തൊരു കാല്‍പ്പനിക വശ്യത. നന്ദി, ശ്രീ. എം.മുികുന്ദന്‍!

ഇനിയിപ്പോള്‍ കമ്പ്യൂട്ടര്‍കളി ഒഴിവാക്കാന്‍ ആവില്ലെന്നാണെങ്കില്‍ ഇതാ ഇവിടെ http://www.helpkidzlearn.com/ ല്‍ പോയി കളിക്കൂ. വിഡിയോ ഗെയിം, കഥകള്‍ എല്ലാമുണ്ട്.

കാര്‍ട്ടൂണ്‍ ചാനലുകള്‍ കാണാം, ആംഗലേയപുസ്തകങ്ങളും വായിക്കാം, പക്ഷേ കൂട്ടത്തില്‍ കുറച്ചു മലയാളം പുസ്തകങ്ങള്‍ കൂടി വായിക്കണ്ടേ? കാരൂര്‍ നീലകണ്ഠപ്പിള്ള, പന്തളം കേരളവര്‍മ്മ, സുമംഗല, പി.നരേന്ത്രനാഥ്, മലയത്ത് അപ്പുണ്ണി, കെ. തായാട്ട്, കോലഴി ഗോപാലകൃഷ്ണന്‍ അങ്ങനെ എത്രയോ പേരുടെ ബാലസാഹിത്യപുസ്തകങ്ങള്‍ വായിക്കാനുണ്ട്. അവ കുഞ്ഞുങ്ങളെ ഹൃദയമുള്ളവരാക്കും, ശക്തരാക്കും. അതിമാനുഷരുടെ കഥകള്‍ കുട്ടികളെ വേറൊരു അപ്രായോഗികതലത്തില്‍ എത്തിക്കുകയേയുള്ളു. മണ്ണില്‍ ചവിട്ടി നില്‍ക്കാന്‍ പഠിപ്പിക്കില്ല. ഐതിഹ്യമാല, കഥാസരിത് സാഗരം, നന്തനാരുടെ ഉണ്ണിക്കുട്ടന്റെ ലോകം, ഉണ്ണിക്കുട്ടന്‍ സ്‌കൂളില്‍ ഇങ്ങനെ വലിയ പട്ടികയുണ്ട്, കുട്ടികള്‍ വായിച്ചിരിക്കേണ്ടവ.

ചുക്കും ഗെക്കും എന്ന റഷ്യന്‍ കുട്ടിപ്പുസ്തകത്തിലെ മറക്കാത്ത ഒരേട്- പട്ടാളത്തിലുള്ള അച്ഛന്റെ കത്തു വായിക്കുകയാണ് അമ്മ. വായിക്കുന്ന അമ്മയെ തന്നെ നോക്കിയിരിക്കയാണ് വികൃതികളായ ചുക്കും ഗെക്കും.

'അമ്മ ചിരിച്ചു, ചുക്കും ഗെക്കും ചിരിച്ചു. അമ്മ കരഞ്ഞു, ചുക്കും ഗെക്കും കരഞ്ഞു!'

എത്ര അര്‍ത്ഥവത്തായ വരികള്‍!കുട്ടിക്കാലത്ത് അമ്മ ദൈവമാണ്, കുഞ്ഞുങ്ങള്‍ക്ക്. പിന്നെ കൗമാരത്തിലെന്നോ ശത്രുവാകും, സ്വന്തം ജീവിതം തുടങ്ങുമ്പോള്‍ വീണ്ടും അമ്മ സ്‌നേഹിതയാകും!





 
 

Thursday, April 12, 2012

രക്തച്ചുവപ്പ്

varika link 04.04.12

                     
'അന്നദാനം മഹാദാനം' എന്നു ചൊല്ല്, കാരണം, ദാനം സ്വീകരിക്കുന്നയാള്‍ 'മതി' എന്നു നിറഞ്ഞ മനസ്സോടെ പറയുന്നത് അപ്പോള്‍ മാത്രമേയുള്ളു. എന്നാല്‍ രക്തദാനം ശരിക്കും ജീവല്‍ദാനം തന്നെ ആണ്.

ഗൂഗിള്‍ പ്ലസില്‍ ദിനേനയെന്നോണം പോസ്റ്റുകള്‍ വരാറുണ്ട്, രക്തം വേണം എന്ന് അറിയിക്കുന്നവ. കേരളത്തില്‍ എമ്പാടുമുള്ള ആശുപത്രികളില്‍ കഴിയുന്നവര്‍ക്കു വേണ്ടി. ഒന്നും അവനവന്റെ ആള്‍ക്കാര്‍ക്കു വേണ്ടിയല്ല, പരോപകാരാര്‍ത്ഥമാണ്. കിട്ടിയ വിവരവും മിയ്ക്കവരും അറിയിക്കാറുണ്ട്.

രക്തദാനത്തെപ്പറ്റി അറിയാന്‍ http://www.blooddonors.in/  സന്ദര്‍ശിക്കാം. നമുക്ക് രക്തം ആവശ്യമുണ്ടെങ്കില്‍  ഇവിടെ രജിസ്റ്റര്‍ ചെയ്യുകയും ആവാം. അതിലെ അംഗങ്ങള്‍ മുഖേന രക്തം കിട്ടും. കേരളത്തിലെ ബ്ലഡ് ബാങ്കുകളെപ്പറ്റി ഉള്ള വിവരങ്ങള്‍ http://life.ioss.in/bloodbanks.php എന്ന സൈറ്റില്‍ ലഭ്യമാണ്. ഈ സൈറ്റില്‍ നിന്ന്- 'നമ്മുടെ ശരീരത്തില്‍  5.5 ലിറ്റര്‍ രക്തമുണ്ട്, ദാതാവിന്റെ തൂക്കത്തിനനുസൃതമായി 350-450 മി.ലി രക്തമാണ് ഒരു പ്രാവശ്യം എടുക്കുക. എടുത്ത അത്രയും രക്തം 24 മണിക്കുറിനകവും അതിലെ ഹീമോഗ്ലോബിന്‍, സെല്‍ഘടകങ്ങളും 2 മാസത്തിനകവും പുനരുത്പ്പാദിപ്പിക്കപ്പെടുന്നു. അതിനാല്‍ മൂന്നു മാസത്തിലൊരിക്കല്‍ രക്തം ദാനം ചെയ്യുന്നത് സുരക്ഷിതമാണ്.  ' നമ്മുടെ ശരീരം ശരിക്കും ഒരു നിര്‍മ്മാണശാല തന്നെ അല്ലേ?

ഏതെല്ലാം രക്തഗ്രൂപ്പുകള്‍ ഒന്നിച്ചു പോകും, ആര്‍ക്ക്  ഏത് സ്വീകരിക്കാം, ദാനം ചെയ്യാം മുതലായി എല്ലാവരും അവശ്യം അറിഞ്ഞിരിക്കേണ്ട പ്രാഥമിക അറിവുകള്‍,  വിക്കിയിലുണ്ട് - http://en.wikipedia.org/wiki/Blood_type .  O - , AB+, വിഭാഗക്കാരേ, നിങ്ങള്‍ താരതമ്യേന ഭാഗ്യമുള്ളവര്‍, എന്തെന്നാല്‍ നിങ്ങള്‍  യഥാക്രമം ആഗോള രക്തദാതാക്കളും (Donor) രക്തസ്വീകാര്യരും (Recipient) അത്രേ! തീര്‍ച്ചയായും വ്യവസ്ഥകള്‍ക്കു വിധേയമായി മാത്രം.

A,B, O എന്നീ അടിസ്ഥാന വിഭാഗങ്ങളില്‍ പെടാത്ത ബോംബേ ബ്ലഡ് ഗ്രൂപ്പ്്
കാര്‍ക്ക്  http://www.rarebloodtypes.org/bombay_blood_group.php സന്ദര്‍ശിക്കാം. എല്ലാ വിവരങ്ങളും അവിടെ ലഭ്യമാണ്.

ഇനി ചില ചുവപ്പു ചൊല്ലുകള്‍/ ചിന്തകള്‍.

' ഈ നീതിമാന്റെ രക്തത്തില്‍ എനിക്കു പങ്കില്ല' എന്നു പീലാത്തോസ് പണ്ടു കൈകഴുകി-

യേശുക്രിസ്തുവിനെ കുറ്റവിചാരണ ചെയ്ത് ശിക്ഷ വിധിക്കേണ്ടത് ബത്‌ലഹേം ഗവര്‍ണ്ണറായിരുന്ന പിലാത്തോസ്(Pontius Pilate) ആയിരുന്നു. 'അവന്‍ സ്‌നേഹസന്ദേശവാഹകനാണ്, വധ്യനല്ല, ദൈവപുത്രനായ അവനെ വിധിക്കരുത് ' എന്ന് താന്‍ സ്വപ്‌നം കണ്ടിരിക്കുന്നു എന്ന്, വിധി പ്രസ്താവിക്കും മുമ്പ് അദ്ദേഹത്തിന് തന്റെ ഭാര്യ ക്ലോഡിയയുടെ ഒരു സന്ദേശം കിട്ടി. പക്ഷേ, ഗവര്‍ണ്ണര്‍ അതു ഗൗരവത്തിലെടുത്തില്ല. മനസ്സിന്റെ അസ്വസ്ഥത സഹിക്കാതായപ്പോള്‍, അദ്ദേഹം കൈകഴുതി തുടച്ച് സ്വഗ്രഹം പൂകി. അപ്പോഴും ക്ലോഡിയ ചോദിച്ചു, 'നീതിമാനെ കുരിശിലേറ്റിയിട്ട് കൈ കഴുകിയാല്‍ പാപം തീരുമോ?' നീതിമാനായ പിലാത്തോസ് ഈ ഹൃദയഭാരത്തോടെ തന്നെ ഇഹലോകവാസം വെടിഞ്ഞു. ജോര്‍ദ്ദാന്‍ തീരങ്ങളില്‍ ആ നീതിമാന്റെ ആത്മാവ് ഇപ്പോഴും അലയുന്നുണ്ടാവാം! നീതിനിഷ്ഠയുള്ളവര്‍ക്കും ചിലപ്പോള്‍ അനീതി പ്രവര്‍ത്തിക്കേണ്ടതായ് വരും!-(വിവരങ്ങള്‍ക്കു കടപ്പാട്-ശ്രീമതി. എം.ജി. ഭവാനി.)

'രക്തം രക്തത്തെ തിരിച്ചറിയുന്നു'- കാലാനുസൃതം ഇത് പരിഷ്‌കരിച്ച് 'രക്തം രക്തത്തെ വികര്‍ഷിക്കുന്നു' എന്നാക്കണമെന്നു തോന്നിയിട്ടില്ലേ ചിലപ്പോഴെങ്കിലും ?

' രക്തത്തിന് വെള്ളത്തേക്കാള്‍ കട്ടി കൂടും.  '

സാഹചര്യം കൊണ്ടോ, ഉപജീവനാര്‍ത്ഥമോ ശരീരം വില്‍ക്കാന്‍ നിര്‍ബന്ധിതരായ സ്ത്രീകള്‍, ആധുനികഭാഷയില്‍ 'സെക്‌സ്് വര്‍ക്കേഴ്‌സ്', താമസിക്കുന്ന തെരുവുകള്‍ അറിയപ്പെടുന്നതും ചുവന്ന തെരുവ് എന്ന്. വിലക്കപ്പെട്ടത് എന്നു സൂചിപ്പിക്കാനാവും ആ പേര്, മുന്നോട്ടു പോകരുത് എന്നു പിടിച്ചു നിര്‍ത്തുന്ന ചുവന്ന ട്രാഫിക് ലൈറ്റ് എന്ന പോലെ.

ഇനി ജീവിതത്തില്‍ നിന്ന് ഒരു 'ചുവപ്പു തമാശ'- അച്ഛന്റെ ആത്മസുഹൃത്തിന്റെ മക്കളുടെ സന്ദര്‍ശനവേള.

'അങ്കിളിന്റെ രക്തം ഇപ്പോഴും കടും ചുവപ്പു തന്നെ അല്ലേ?  ' കറ കളഞ്ഞ കമ്യൂണിസ്റ്റ് ആണ് അദ്ദേഹം.

'ഉം ,അതെ, പക്ഷേ ഈയിടെ ആസ്പത്രീലായപ്പോള്‍  വേറാരുടേയോ രക്തം കൊടുത്തു, അതില്‍ പിന്നെ 'ദൈവം ' എന്നൊക്കെ പറയുന്നുണ്ട്് !  '

സമര്‍പ്പണം- മൂന്നു മാസത്തിലൊരിക്കല്‍ കൃത്യമായി രക്തദാനം ചെയ്ത് മാതൃക കാണിക്കുന്ന കമ്പൂട്ടര്‍ വിദഗ്ധനായ സുഹൃത്ത് സുരേഷിന്.




Saturday, March 24, 2012

വൈ ദിസ് കൊയ്‌ലാ മൈനിംഗ് ഡി?

(Weekly -08.02.12-page)
               
ജംഗ്ലിസ്ഥാന്‍ റിപ്പബ്ലിക്കിലെ ഭാലൂ എന്ന കരടി, ഷേര്‍ഖാന്‍ എന്ന കടുവയുടെ വാദ്യോപകരണ അകമ്പടിയോടെ പാടുന്നതാണ് ഈ പാട്ട്. കൊയ്‌ലാ മൈനിംഗ് എന്നാല്‍ കല്‍ക്കരി ഖനനം. കല്‍ക്കരി ഖനനത്തിന്റെ പേരില്‍ കാടു നശിപ്പിക്കപ്പെടുമ്പോള്‍ സ്വന്തം കിടക്കാടം നഷ്ടപ്പെടുന്ന ഭയപ്പാടിലാണവര്‍. ദാ, ഇവിടെ http://www.greenpeace.in/junglistan/save/why-this-koyla-mining-di.php  കേള്‍ക്കാം കൊലവെറി അനുകരിച്ച് അവരുടെ പാട്ട്, അല്ലെങ്കില്‍ koyla mining എന്നു ഗൂഗിളില്‍ തെരഞ്ഞാലും ലിങ്കുകള്‍ കിട്ടും. ധനുഷിനേക്കാള്‍ ഒട്ടും മോശമില്ലാതെ പാടുന്നുണ്ട് ഭാലു. അതും വളരെ വലിയ ഒരു കാരണത്തിനു വേണ്ടി.

അതെ, നിങ്ങള്‍ ഊഹിച്ചതു ശരി തന്നെ. ഭാലുവും ഷേര്‍ഖാനും റഡ്യേഡ് കിപ്ലിംഗിന്റെ ജംഗിള്‍ ബുക്കിലെ കഥാപാത്രങ്ങളാണ്. അവര്‍ കഴിഞ്ഞ നവംബര്‍ അവസാന ആഴ്ച്ചയിലൊരു ദിനം ബാംഗ്ലൂരിലെ കബണ്‍ പാര്‍ക്കില്‍ മുളങ്കൂട്ടങ്ങള്‍ക്കിടയില്‍ നിന്നു ചാടി വന്നു, നേരേ ജനങ്ങള്‍ക്കിടയിലേക്ക്. കല്‍ക്കരി ഖനനത്തിന്റെ പേരില്‍ കാടു നശിപ്പിക്കപ്പെടുന്നതിനെപ്പറ്റി, കാടു നിലനിര്‍ത്തേണ്ടതിന്റെ ആവശ്യകതയെപ്പറ്റി ഗ്രീന്‍പീസ് -http://www.greenpeace.org/-പ്രവര്‍ത്തകര്‍ക്കൊപ്പം അവരും ജനങ്ങളെ ബോധവല്‍ക്കരിച്ചു. മാത്രമല്ല ജംഗ്ലിസ്ഥാന്‍ റിപ്പബ്ലിക്കിലെ പൗരരാകുവാന്‍ ആഗ്രഹിക്കുന്നവര്‍ക്ക് അവര്‍ സാങ്കല്‍പ്പിക പാസ്‌പോര്‍ട്ടും പൗരത്വവും നല്‍കുകയും ചെയ്തു! അവരുടെ സംരംഭങ്ങളോട് ഐക്യദാര്‍ഡ്യം പ്രകടിപ്പിക്കുവാന്‍ ആഗ്രഹിക്കുന്നെങ്കില്‍ നിങ്ങള്‍ക്കും ജംഗ്ലിസ്ഥാന്‍ റിപ്പബ്ലിക്കില്‍ പൗരത്വമെടുക്കാം.

ഈ റിപ്പബ്ലിക്കിലെ എല്ലാവരുടേയും പ്രിയ സിനിമാതാരം ആരെന്നറിയുമോ? അഭയ് ഡിയോള്‍!.. അദ്ദേഹം മദ്ധ്യപ്രദേശിലെ മഹാനില്‍ പച്ചപ്പു നിറഞ്ഞ കാടുകള്‍ക്കു മുകളിലൂടെ ബലൂണില്‍ സഞ്ചരിച്ചു, ആ പച്ചപ്പ് കല്‍ക്കരിഖനനത്തിനായി നശിപ്പിക്കപ്പെടാതിരിക്കണം എന്ന്് അദ്ദേഹവും നമ്മെപ്പോലെ ആശിക്കുന്നു. യൂട്യൂബില്‍ കാണാം അദ്ദേഹത്തിലെ പ്രകൃതിസ്‌നേഹിയെ.

1971 ല്‍ വാന്‍കൂവറില്‍ രൂപീകരിച്ച ഗ്രീന്‍പീസ്,  അഹിംസാതത്വങ്ങളില്‍ അധിഷ്ഠിതമായ ആഗോളപരിസ്ഥിതി സംരക്ഷണത്തിനു വേണ്ടി നിലകൊള്ളുന്നവരാണ്. കൂടുതല്‍ അറിയാന്‍ അവരുടെ സൈറ്റില്‍ പോകാം.  നമുക്കു കിട്ടിയ വരദാനമാണീ ഭൂമിയെന്നും അതു കേടുകൂടാതെ വരും തലമുറകള്‍ക്കായി സൂക്ഷിക്കാന്‍ ബാദ്ധ്യസ്ഥരാണെന്നതും, സൗകര്യപൂര്‍വ്വം മറന്നു പോകുന്ന നമ്മളെ ഉണര്‍ത്താന്‍, വേണം ഇത്തരം സംഘടനകള്‍. ഇന്റര്‍നെറ്റ് രാക്ഷസന്‍ ഫേസ്ബുക്ക് കല്‍ക്കരിയോടു വിടപറയാന്‍ തീരുമാനിച്ചു എന്നത് ഗ്രീന്‍പീസിന്റെ പ്രവര്‍ത്തനാംഗീകാരമായി കണക്കാക്കാം.

ഇന്‍ഡ്യക്ക് ഏറ്റവും അനുയോജ്യമായത് മലിനീകരണം ഒട്ടുമില്ലാത്ത ചെറുകിടജലവൈദ്യുതി പദ്ധതികളാണ്, പഞ്ചവത്സരപദ്ധതികള്‍ പ്രകാരം തെര്‍മല്‍, ന്യൂക്ലിയര്‍ പദ്ധതികള്‍ക്ക് ഇതിനു പിന്നിലെ സ്ഥാനമുള്ളു, എന്നാല്‍ അതെല്ലാം നമ്മള്‍ വിഗണിക്കയാണ് എന്ന് പ്രമുഖ പാരിസ്ഥിതികനായിരുന്ന ശ്രീ. കെ.വി. സുരേന്ദ്രനാഥ് (നിയമസഭ-lokസഭാ അംഗവും കൂടിയായിരുന്നു അദ്ദേഹം) കലാകൗമുദിയില്‍ എഴുതിയിരുന്നത് ഓര്‍മ്മിക്കുന്നു.വന്‍ അണക്കെട്ടുകള്‍ ജലബോംബുകളാണെന്ന് നമുക്കു മുല്ലപ്പെറിയാറിന്റെ വെളിച്ചത്തില്‍ നിസ്സംശയം പറയാം. എന്നാല്‍ മിനി ഹൈഡല്‍ പ്രോജകട്‌സ്-ചെറുകിട ജലസേചനപദ്ധതികള്‍-അങ്ങനെയല്ല. ദീര്‍ഘദര്‍ശികള്‍ ഇല്ലാത്തതല്ല, അവരെ ചെവിക്കൊള്ളാത്തതാണ് എന്നും നമ്മുടെ പ്രശ്‌നം.

മുല്ലപ്പെരിയാര്‍ നമ്മുടെ ഉറക്കം കെടുത്തുമ്പോഴും കൂടങ്കുളത്തെ ന്യൂക്ലിയര്‍ പവ്വര്‍ പ്രോജക്ട് നമ്മെ തീരെ ആശങ്കപ്പെടുത്തുന്നതേയില്ല. തമിഴ്‌നാട്ടിലല്ലേ എന്നായിരിക്കും നമ്മുടെ വിചാരം. അവിടുത്തെ കമ്പൂട്ടറിന് ഒരു പിഴവു സംഭവിച്ചാല്‍ അവിടുന്ന് ആകാശദൂരം വളരെ കുറവായ നമ്മുടെ തലസ്ഥാനനഗരി കത്തിച്ചാമ്പലാവില്ലെന്നാരു കണ്ടു? ഹേ, ഭോഷ്‌ക് എന്നു പറയാന്‍ തോന്നുന്നുണ്ടോ ? പറയും മുമ്പ് റഷ്യയിലെ ചെര്‍ണോബില്‍ ആണവദുരന്തത്തെ കുറിച്ച് ഒന്നു പഠിക്കണേ.

എല്ലാം വേണ്ട, വേണ്ട എന്നു പറയുന്നത് എളുപ്പം, അങ്ങനെ പറയുന്നവര്‍ക്കു തന്നെ ബാദ്ധ്യതയുണ്ട് പകരം മറ്റൊന്നു കാണിച്ചു കൊടുക്കുവാനും. വൈദ്യുതി ഉത്പാദനത്തിന് , പ്രസരണനഷ്ടം കുറയ്ക്കാനുള്ള മാര്‍ഗ്ഗങ്ങള്‍ അവലംബിക്കുന്നതിനൊപ്പം പ്രകൃതിഗത്യാ ഉള്ള ശുദ്ധമായ പാരമ്പര്യേതര സ്രോതസ്സുകള്‍ ഉപയോഗിക്കുകയും  ചെയ്താല്‍ ഉത്പാദനവും ആവശ്യങ്ങളും തമ്മിലുള്ള വിടവു നികത്താനാകുമെന്ന്് ഗ്രീന്‍പീസ് അഭിപ്രായപ്പെടുന്നു. തുടക്കത്തിലെ ഉത്പാദനച്ചെലവ് തീര്‍ച്ചയായും കൂടുതലായിരിക്കും, അതിന് സര്‍ക്കാര്‍ സബസിഡി നല്‍കിയേ മതിയാകൂ. കാര്‍ഷികാവശ്യങ്ങള്‍ക്കു വേണ്ടി മാത്രം നല്‍കേണ്ട ഡീസല്‍ സബ്‌സിഡി  മൊബൈല്‍ കമ്പനികള്‍ക്കു നല്‍കിക്കൊണ്ടിരിക്കുന്നത് തെറ്റാണെന്ന് മന്ത്രി ജയറാം രമേശ് തന്നെ അഭിപ്രായപ്പെട്ടിട്ടുണ്ടല്ലോ!



Monday, March 12, 2012

റൊട്ടിയും റോസാപ്പൂക്കളും


 (Online link-varika released 8.3.2012)                      

ഇന്ന് മാര്‍ച്ച് 08, അന്താരാഷ്ട്ര വനിതാ ദിനം. ആദ്യ വനിതാ ദിനാചരണത്തിന് 101 വയസ്സായിരിക്കുന്നു. പറഞ്ഞു പറഞ്ഞു മുനയൊടിഞ്ഞ വനിതാദിന ചിന്തകള്‍ക്ക് , അല്ല, പരിദേവനങ്ങള്‍ക്ക്, പകരം ചരിത്രത്തിലെ വനിതാമുന്നേറ്റങ്ങളെപ്പറ്റി കേട്ടാലും.

തുണിവ്യവസായശാലകളില്‍ ഹീനമായ തൊഴില്‍ സാഹചര്യങ്ങളില്‍ പണിയെടുത്തിരുന്ന 15000 ത്തോളം വനിതകള്‍ മെച്ചപ്പെട്ട ജീവിത സാഹചര്യങ്ങള്‍ക്കായി 1908 ല്‍ ന്യൂയോര്‍ക്കില്‍ നയിച്ച ഐതിഹാസിക സമരമായ 'റൊട്ടി യും റോസാപ്പൂക്കളും' ആണ് വനിതാദിനത്തിനു നിദാനം. കുടുംബാംഗങ്ങള്‍ ക്ക് ആഹാരം നേടാനുള്ള സാമ്പത്തികം എന്ന അവകാശം റൊട്ടിയും നല്ല ജീവിതസാഹചര്യങ്ങള്‍ എന്ന അവകാശം  റോസാപ്പൂക്കളും സൂചിപ്പിക്കുന്നു.

ന്യൂയോര്‍ക്കിലെ തുണിവ്യവസായമേഖലയില്‍ പണിയെടുത്തിരുന്ന കൗമാരക്കാരികളായ കുടിയേറ്റക്കാരുടെ സമരമായിരുന്നു 1909 ല്‍ നടന്ന '20000 ന്റെ ഉദയം'. ഉക്രേന്‍കാരി ആയ ക്ലാര ലെംലിച്ച് എന്ന 19 കാരി ആയിരുന്നു അതിന്റെ നേതാവ്. ഈ സമരങ്ങളില്‍ നിന്നു പ്രചോദനം ഉള്‍ക്കൊണ്ട ജര്‍മ്മന്‍കാരിയായ ക്ലാര സെറ്റ്കിന്‍ ആണ് സ്ത്രീകളുടെ രാഷ്ട്രീയ-സാമ്പത്തിക ആവശ്യങ്ങള്‍ക്കായി  അന്താരാഷ്ട്ര വനിതാദിനം എന്ന ആശയം വച്ചത്. അവരുടേയും റഷ്യാക്കാരിയായ അലക്‌സാണ്ട്രാ കൊലന്‍ടായുടേയും ശ്രമഫലമായി 1911 ല്‍ ആദ്യഅന്താരാഷ്ട്ര വനിതാ ദിനം ആചരിക്കപ്പെട്ടു.

സാക്ഷാല്‍ ലെനിന്‍ വനിതാമുന്നേറ്റങ്ങളെപ്പറ്റി പറഞ്ഞതു ശ്രദ്ധിക്കാം-'സ്ത്രീ വിമോചനത്തിനായുള്ള നിയമങ്ങള്‍ എന്തെല്ലാമണെങ്കിലും അവള്‍ ഇപ്പോഴും ഒരു ഗാര്‍ഹിക അടിമ തന്നെയാണ്. ബാലിശമായ വീട്ടുതിരക്കുകള്‍ അവളെ തരംതാഴ്ത്തുന്നു, അടുക്കളയിലും ബാലഗൃഹങ്ങളിലുമായി അവളെ ചങ്ങലക്കിടുന്നു, അവള്‍ അവളുടെ അദ്ധ്വാനം, തികച്ചും അപരിഷ്‌കൃതമായി, ഉത്പാദനക്ഷമമല്ലാത്ത, ഞരമ്പു തകര്‍ക്കുന്ന, കഠിനമായ വിരസതയായി, നശിപ്പിക്കുന്നു. ഈ നീചമായ വീട്ടുപണികളില്‍ നിന്ന് അവള്‍ മോചിതയാകുമ്പോള്‍ മാത്രമേ ശരിയായ വനിതാവിമോചനം സാദ്ധ്യമാകൂ.' സഖാവ് ലെനിന് അങ്ങനെയൊക്കെ പറയാം, പക്ഷേ ഇപ്പണിയൊക്കെ നുമ്മ ആണുങ്ങള്‍ പങ്കുവെയ്ക്കാനോ, ച്ഛായ് , മോശം ! വേണോങ്കില്‍ പെണ്ണുങ്ങള്‍ പണിക്കു പോയി രൂഭാ കൊണ്ടു വന്നോട്ടെ, ഞങ്ങള്‍ക്കും മക്കള്‍ക്കും വേണ്ടി പൊങ്കാലയും ഇട്ടോട്ടെ, പക്ഷേങ്കി വീട്ടു ജോലി മുഴ്വോനും അവര്‍ തന്നെ ചെയ്‌തേ തീരൂ, ഞങ്ങ ആണുങ്ങളുണ്ടല്ലോ ഭരണസഭകളില്‍ പോകാന്‍! ഹല്ല, പിന്നെ!

പെണ്ണുങ്ങള്‍ ഭരിച്ചാലും ഭരും എന്നു കാണിച്ചു തരുന്ന, രണ്ടു സാധാരണ സ്ത്രീകളെപ്പറ്റി. രാജസ്ഥാന്‍കാരികളായ ഇവര്‍ക്ക് ജീവിതപാഠങ്ങള്‍ മാത്രമാണ് കൈമുതല്‍. ഐക്യരാഷ്ട്ര സഭയുടെ സ്ത്രീകളും ദാരിദ്യവും പദ്ധതിയുടെ സജീവ പ്രവര്‍ത്തകരാണവര്‍.

കര്‍ഷകതൊഴിലാളിയായ ,വീട്ടുകാര്യങ്ങള്‍ മാത്രം അറിയാമായിരുന്ന നാണം കുണുങ്ങിയായ ബദം ദേവി ഇന്ന് ലഹോറഗ്രാമത്തലവിയാണ്. വിദ്യാഭ്യാസത്തിന്റെ വിലയറിഞ്ഞ അവര്‍ അവിടുത്തെ സ്‌കൂളുകളുടെ പ്രവര്‍ത്തനം കൃത്യമായി വിലയിരുത്തുന്നു, കുട്ടികള്‍ക്ക് ഉച്ചയാഹാരം നല്‍കുന്നു. ഗ്രാമത്തിലെ പൊട്ടിപ്പൊളിഞ്ഞ റോഡ് നന്നാക്കാന്‍ സര്‍ക്കാര്‍ ഫണ്ടിനൊപ്പം സ്വന്തം കയ്യില്‍ നിന്നു 3000 രൂപാ കൂടി ചെലവാക്കി! സര്‍ക്കാര്‍ഫണ്ട് കുടുംബത്തിലേക്കു കൊണ്ടുപോകയല്ല ചെയ്തത്.

രാജ്കലാദേവി ഒരു മാനേജ്‌മെന്റ് സ്‌കൂളിലും പഠിച്ചിട്ടില്ല. പക്ഷേ ഇരുത്തം വന്ന നേതാവിനെപ്പോലെ അവര്‍ രാജസ്ഥാനിലെ ഹിംഗ്വാഡ ഗ്രാമത്തിന്റെ ആവശ്യങ്ങള്‍ അറിയുന്നു, നിറവേറ്റുന്നു, സ്ത്രീകളുടെ വലിയ കൂട്ടത്തെ അഭിസംബോധന ചെയ്യുന്നു, പെണ്‍കുട്ടികളുടെ വിദ്യാഭ്യാസത്തിനാണ് അവര്‍ ഊന്നല്‍ നല്‍കുന്നത്.

പടിഞ്ഞാറന്‍ വനിതകള്‍ക്കു സമര്‍പ്പിച്ച് ജെയിംസ് ഒപ്പെന്‍ഹെം 1911 ല്‍ എഴുതിയ 'റൊട്ടിയും റോസാപ്പൂക്കളും' കവിതയില്‍ നിന്ന്-

ഞങ്ങള്‍ തെരുവിലിറങ്ങുമ്പോള്‍, പുരുഷന്മാര്‍ക്കു വേണ്ടിയും പോരാടുന്നു,
കാരണം അവര്‍ സ്ത്രീപുത്രരത്രേ, ഞങ്ങള്‍ അവര്‍ക്കു വീണ്ടും മാതാവാകുന്നു.
ജനനം മുതല്‍ ജീവന്‍ പിരിയും വരെ ജീവിതങ്ങള്‍ വിയര്‍പ്പിക്കാന്‍ ഞങ്ങള്‍ തയ്യാറല്ല,
ഹൃദയങ്ങളും ശരീരങ്ങളും പട്ടിണി കിടക്കില്ല; ഞങ്ങള്‍ക്കു അപ്പം തരൂ, റോസാപ്പൂക്കളും ഒപ്പം തരൂ.

കൂടുതല്‍ വായനയ്ക്ക്- 1. http://www.un.org/en/events/womensday/
2. http://socialistworker.org/2011/03/08/womens-place-in-the-revolution
3. http://en.wikipedia.org/wiki/Bread_and_Rosse