Monday, March 21, 2011

സുസ്‌മേഷം

 (Varika online link-published 19.03.2011)
കൈ നിറയെ അവാര്‍ഡുകളുമായി പുതുവര്‍ഷം ആരംഭിച്ച മലയാള കഥാകാരന്‍ ആരെന്നു ചോദിച്ചാല്‍ ഉത്തരം ഒന്നേയുള്ളു, യുവകഥാകൃത്ത് സുസ്‌മേഷ് ചന്ദ്രോത്ത്. ഒരാളുടെ രചനകളെത്തേടി എത്ര അവാര്‍ഡുകള്‍! സുസ്‌മേഷിന്റ http://susmeshchandroth.blogspot.com/ ബ്ലോഗിലൂടെ.....

' കോവിലന്‍-തീയില്‍ ചുട്ട വാക്കുകള്‍ ' എന്ന പോസ്റ്റിലൂടെയാണ് സുസ്‌മേഷ് മലയാളം ബ്ലോഗര്‍ കൂട്ടായ്മയിലേയ്ക്കു പ്രവേശിക്കുന്നത്.വികാരതീവ്രമായ ഓര്‍മ്മകള്‍ പങ്കു വയ്ക്കലല്ല അത്. പൊള്ളുന്ന സത്യങ്ങള്‍ പറയുകയാണ്.

'ജഠരാഗ്‌നിയെപ്പറ്റിയെഴുതാന്‍,വിശപ്പാണ് ഏറ്റവും വലിയ വേദാന്തമെന്നു പറയാന്‍ കോവിലനില്ല. ഒരു പക്ഷേ വിശപ്പറിഞ്ഞ തലമുറയും അന്യം നില്‍ക്കാന്‍ പോവുകയാണ്. അപ്പോഴും വിശപ്പിന്റെ കാഠിന്യമനുഭവിച്ച മനുഷ്യരെ കണ്ടെത്താന്‍ നമുക്ക് കോവിലനെ വായിക്കേണ്ടതായി വരും. കോവിലന്റെ കൃതികള്‍ ആ ദൗത്യമേറ്റെടുത്ത് മനുഷ്യനെ പുതിയ പാഠങ്ങള്‍ പഠിപ്പിക്കട്ടെ.' തീര്‍ച്ചയായും, പക്ഷേ ആരും വിശപ്പിന്റെ വിളി അറിയാത്ത കാലവും വരട്ടെ, പ്രത്യേകിച്ച് പട്ടിണി തളര്‍ത്തിയ എല്ലുന്തിയ മനുഷ്യക്കോലങ്ങളുള്ള ആഫ്രിക്കന്‍ രാജ്യങ്ങളില്‍.

കഥയും കവിതയും മാത്രമായി ഭാവനാലോകത്തു വിഹരിച്ചാല്‍ മാത്രം പോരാ ഒരു സാഹിത്യകാരന്‍. ജനം ശ്രദ്ധിക്കുന്ന വാക്കുകള്‍ എന്ന നിലയ്ക്ക് ചുറ്റുപാടുകളുമായി സംവദിക്കണം. 'സര്‍ക്കാര്‍ ജനങ്ങള്‍ക്കു വേണ്ടിയാവണം ' തുടങ്ങിയ ശക്തമായ പോസ്റ്റുകളിലൂടെ ഈ ചുമതല നിറവേറ്റുന്നുണ്ട്.

മലയാളം മരിച്ചാലും നമുക്കെന്ത് എന്ന സങ്കടം കലര്‍ന്ന ലേഖനം ഭാഷ വളരേണ്ടതെങ്ങനെ എന്ന് തമിഴരെ നോക്കി ഉദാഹരിക്കുന്നു-
' ഓരോ വിദേശവാക്കിനും നമുക്ക് തത്തുല്യമായ മലയാളം വാക്ക് നിര്‍മ്മിച്ചെടുക്കാന്‍ കഴിയണം. അവിടെ കേട്ട ചില ഉദാഹരണങ്ങള്‍ പറയാം. പലവകൈ കായ്കറി സാദം=ബിരിയാണി, കൈപ്പേശി=മൊബൈല്‍ ഫോണ്‍. മിന്നലഞ്ചല്‍=ഇ മെയില്‍...ഇ മെയിലിന് ഇങ്ങനൊരു തര്‍ജ്ജമ അല്ലെങ്കില്‍ മലയാളവഴക്കമുള്ള ഒരു വാക്ക് കണ്ടെത്താന്‍ കഴിയുമെന്ന്്് നമ്മളാരെങ്കിലും വിചാരിച്ചിട്ടുണ്ടോ. എന്തൊരു ശാലീനതയും ഗാംഭീര്യവുമാണ് മിന്നലഞ്ചല്‍ എന്ന പുതുമയേറിയ പ്രയോഗത്തിന്!' മംഗ്ലീഷ് എന്നോ ഇലയാളം എന്നോ വിളിക്കാവുന്ന സങ്കരഭാഷയില്‍ ബ്ലോഗെഴുതുന്ന എന്നോട് സുസ്‌മേഷിലെ ഭാഷാസ്‌നേഹി ക്ഷമിക്കട്ടെ! ' ഭാഷാ ഇന്‍സ്റ്റിട്ട്യൂട്ടുകാര്‍ പുതുവാക്കുകള്‍ കണ്ടുപിടിക്കാന്‍ മുന്‍ കൈ എടുക്കമെന്നാശിക്കാം.

നമുക്ക് നിലപാടുകള്‍ ഉണ്ടായിരിക്കണം, പ്രതിച്ഛായ സൂക്ഷിച്ചുവയ്ക്കുന്ന ഭരണികള്‍, ബൗദ്ധികനിരാഹാരകാലത്തെ ഓണം, ജനിച്ച ദിവസം തന്നെ മരിച്ചു പോയവര്‍,ഇടുക്കിയെന്ന ഹരിതോദ്യാനം ഇവയെല്ലാം ഈടുറ്റ ലേഖനങ്ങളാണ്, ശക്തപ്രതികരണങ്ങളാണ്, പ്രായോഗിക നിര്‍ദ്ദേശങ്ങളുമുണ്ട്..

ഒക്ടോബര്‍ നവംബര്‍ സുസ്‌മേഷിന് അവാര്‍ഡ് കാലം മാത്രമല്ല, കവിതക്കാലവും കൂടി ആയിരുന്നുവെന്നു തോന്നുന്നു. ഫോണും നെറ്റുമില്ലാത്തൊരു ലോകത്ത്, മധുമതി ഗസല്‍ ,മഴവില്ല്.... 'ഇതിനെന്താഴമെന്നു നിനയ്ക്കുവാന്‍ വയ്യ' ആണ് എനിക്ക് ഏറ്റം ഇഷ്ടപ്പെട്ടത്, ഒരു പക്ഷേ കവിതയേക്കാളേറെ ആ തലക്കെട്ട് .

ചക്ക എന്ന കഥയിലെ 'സിഫിലിസ് കയറിയ ചക്ക ' എന്ന പ്രയോഗം ഇഷ്ടപ്പെട്ടില്ല. ഡിസംബറിലെ കിളിമുട്ടകളില്‍ നിന്ന്

്' ഒന്നറിയാം ഇത് പ്രണയകാലമാണ്. കമ്പിയും കോണ്‍ക്രീറ്റും വേണ്ടാത്ത, മണലിന് അപേക്ഷിക്കേണ്ടാത്ത, പേ വാര്‍ഡും കൈക്കൂലിയും ബേബിഫുഡും ആയയും വേണ്ടാത്ത,പരസ്പരം പഴിചാരലും കുറ്റപ്പെടുത്തലും ഒളിനോട്ടവും ഇല്ലാത്ത, സെല്‍ഫോണ്‍പ്രണയവും സെല്‍പോണ്‍രതിയുമില്ലാത്ത, സ്‌കൂള്‍ ഡൊണേഷനും മത്സരപ്പരീക്ഷയു മില്ലാത്ത, മക്കളെച്ചൊല്ലി പാരമ്പര്യതാല്പര്യങ്ങള്‍ ഇല്ലാത്ത ദാമ്പത്യം. അതാണ് ഓരോ കിളിജീവിതവും'. അലസതയോള മധുരം, ഓഗസ്റ്റിന്റെ ആരംഭം പൂക്കളോടൊപ്പം ഇവയിലും നിറയുന്നത് ലോലപ്രണയഭാവമാണ്.

'താരാട്ടും പൂതപ്പാട്ടും' എന്നിലും ഗൃഹാതുരത ഉണര്‍ത്തി. 'അങ്ങിങ്ങു ചൊല്ലമ്മേ' എന്ന് 'നെറ്റിപ്പനിമതിപ്പോളമേലങ്ങിങ്ങു പറ്റിക്കിടന്ന കുറുനിരകള്‍' എന്ന വരികള്‍ (ഓമനേ നീയുറങ്ങിന്‍ മിഴി വണ്ടിണ എന്നു തുടങ്ങുന്ന ഹൃദ്യമായ താരാട്ടില്‍ നിന്ന്) എന്നെക്കൊണ്ടു പലവട്ടം ചൊല്ലിക്കുമായിരുന്ന എന്റെ മകളുടെ കിളിക്കൊഞ്ചല്‍ ഞാന്‍ വീണ്ടും കേട്ടു.

കാലം എന്ന സംവിധായകന്‍ വിളിച്ചുകൊണ്ടുപോയ വലിയ കലാകാരന്‍മാരായ എം.ജി.രാധാകൃഷ്ണനും ഗിരീഷ് പുത്തഞ്ചേരിക്കുമൊപ്പം എന്തിനിത്ര വൈകി നീ സന്ധ്യേ (ചിത്രം-പകല്‍) എന്ന പാട്ടിന്റെ കംപോസിംഗിനെ കുറിച്ചുള്ള 'ഘനശ്യാമസന്ധ്യാഹൃദയം പോലെ...' ഹൃദ്യമായ ഓര്‍മ്മക്കുറിപ്പാണ്.

സുസ്‌മേഷിന്റെ പോസ്റ്റുകളുടെ തലക്കെട്ടുകള്‍ പൊതുവേ നീണ്ടതാണ്. ബ്ലോഗ് മുഴുവന്‍ വായിക്കുമ്പോള്‍ ഇത്ര ചെറുപ്പത്തില്‍ ഇത്ര അംഗീകാരം എങ്ങനെ എന്നതിന് ഉത്തരം കിട്ടും. ആഴവും പരപ്പുമുള്ള വായന, സമൂഹത്തിലേക്കു തുറന്നു വച്ച കണ്ണും കാതും, കഠിനാദ്ധ്വാനം. ഇതിനെല്ലാം പകരം വയ്ക്കാന്‍ മറ്റെന്തുള്ളു? 'വിരുദ്ധ സാഹചര്യങ്ങളെ സര്‍ഗ്ഗാത്മകമാക്കാനും അസാധാരണ സംഭവങ്ങളെ സമചിത്തതയോടെ നേരിടാനും ഞാന്‍ മനസ്സിനെ പരിശീലിപ്പിച്ചിട്ടുണ്ട്.' (നമുക്കു നിലപാടുകള്‍ ഉണ്ടായിരിക്കണം).ബുദ്ധിയുള്ള എഴുത്തുകാരന്‍!
'ഒടുക്കം വഴിയരികില്‍ ഒരു ഞാവലിന്റെ തൈ വയ്ക്കണം,വരും കാലത്ത് മറ്റുള്ളവര്‍ക്കും മഴ കാണാനായി'. വിതയ്കകൂ സുസ്‌മേഷ്, ഞങ്ങള്‍ അവിടെയിരുന്നു താങ്കള്‍ക്കൊപ്പം മഴ കാണാം.

Tuesday, March 15, 2011

വന്ദനം മലമാതേ..

(Online link-Published 12.03.2011)
സ്ഥലം നോക്കാന്‍ എന്നു പറഞ്ഞു പോകാറുണ്ടെങ്കിലും മലയുടെ താഴെ നിന്ന് അക്ഷരാര്‍ത്ഥത്തില്‍ മുകളിലേക്കു 'നോക്കി' പേരു കേള്‍പ്പിച്ചു തിരികെ പോരുക എന്ന സാധാരണ പതിവു വിട്ട് കഴിഞ്ഞ തവണ ഞങ്ങള്‍ മല കയറുവാന്‍ തന്നെ തീരുമാനിച്ചു. നഗരത്തില്‍ ജനിച്ചു വളര്‍ന്ന കൂട്ടുകാരന്‍ ബൂട്ടസ് ഇട്ടു തയ്യാറായപ്പോള്‍ 'ഓ, ഞാന്‍ മലമകള്‍, എനിക്കെന്തു തയ്യാറെടുപ്പുകള്‍' എന്നു ചിരിച്ചു ഒരു താങ്ങിനു വടി മാത്രം കരുതി.

യാത്ര തുടങ്ങി. കാല്‍ ഭാഗം ആകും മുമ്പ് ഞാന്‍ തളര്‍ന്നു, നഗരവാസിക്ക് കുലുക്കമേതുമില്ല.എന്നെ അതിശയിപ്പിച്ച് 'കൊക്കെത്ര കുളം കണ്ടതാ 'എന്ന ഷമ്മി തിലകന്‍ സ്റ്റൈല്‍. പിറകേ വച്ചു പിടിച്ചു, പതിയെ പതിയെ. മലമകള്‍ എന്ന അഹങ്കാരത്തിനു, ലാഘവഭാവത്തിനു ഇടിവു തട്ടി തുടങ്ങി.അപ്പോള്‍ തോന്നി പെണ്ണായി പോയില്ലേ, എന്തായാലും ശബരിമല കയറാന്‍ അയ്യപ്പസ്വാമിയുടെ ആള്‍ക്കാര്‍ എന്നവകാശപ്പെടുന്നവര്‍ സമ്മതിക്കില്ല, ചൂരിദാര്‍ ഇട്ട് വനിതകള്‍ തൊഴുതിട്ടും ഗുരുവായൂരുന്നു കണ്ണന്‍ എങ്ങും പോയില്ലല്ലോ എന്ന സ്്രതീപക്ഷചിന്തയൊന്നും അവര്‍ക്കില്ലല്ലോ...പിന്നെ അതു കരിമലകയറ്റമായി സങ്കല്‍പ്പിച്ചു ശരണം വിളിയായി....

തിരികെ ഇറങ്ങവേ തെന്നി വീണു,പല വട്ടം. കയ്യ് ഉരസി തൊലി പോയി-മുറിവ്,നീറ്റല്‍ ചതവ്, സങ്കടം. ചുറ്റും നോക്കി വേഗം ഒരു ചെടിയുടെ ഇലകള്‍ പറിച്ച് മുറിവില്‍ വച്ചു തന്നു.ഇളം വയലറ്റ് കുഞ്ഞുപൂക്കളുള്ള ആ ചെടി അയഡിന്‍ ചെടിയാണത്രേ.അയഡിന്‍ തേച്ചാലെന്ന വണ്ണം തന്നെ നിറമായി നീളത്തിലുള്ള മുറിവിന്. നീറിയതുമില്ല.മറ്റു യാതൊരു മരുന്നും പിന്നെ ഇടേണ്ടി വന്നതുമില്ല. നാട്ടുകാരി, നഗരവാസി എന്നതരംതിരിവുകളുടെ മൂഢത്വം എനിക്കു മനസ്സിലായി എന്റെ അഹങ്കാരം തീര്‍ത്തിലിഞ്ഞില്ലാതായി. സ്വാമി ശരണം!

മുറികൂട്ടി എന്ന ചെടിയുടെ നീരെടുത്ത് ചതവില്‍ പുരട്ടി, ശുഭഫലം!പ്രശ്‌നനത്തിനൊപ്പം പ്രശ്‌നപരിഹാരവും തൊട്ടടുത്തു കരുതുന്ന മലമാതേ നിനക്കു സ്്‌തോത്രം! നഗരത്തിലിരുന്നിട്ടും എല്ലാം വായിച്ചറിഞ്ഞ് തക്ക സമയത്ത് ഉപയുക്തമാക്കി തന്ന കൂട്ടുകാരനും പെരുത്തു നന്ദി. ഇല്ലെങ്കില്‍ ഞാന്‍ മെഡിക്കല്‍ ഷോപ്പു പൊടിയോ ലേപനമോ ഇട്ട് തൊലി കേടാക്കിയേനേ!

ആ ചെടി ഏതെന്നു കണ്ടുപിടിക്കാന്‍ പോയത് http://ayurvedicmedicinalplants.com/ എന്ന സൈറ്റിലേക്കാണ്.പക്ഷേ ആ പേരില്‍ കാണാനായില്ല. മറ്റന്തെിങ്കിലും പേരിലായിരിക്കും അറിയപ്പെടുക.അവിടെ പ്ലാന്റ്‌സ് എന്ന ഹെഡ് ക്ലിക്ക് ചെയ്താല്‍ ബൊട്ടാണിക്കല്‍ / സംസ്‌കൃതം മലയാളം പേരുകളില്‍ ഇഷ്ടമിളളതു വച്ച് വീണ്ടും തിരയാം. മലയാളം എടുത്ത് മുറികൂട്ടി എന്നു തെരഞ്ഞപ്പോള്‍ മറ്റൊരു ചെടി പക്ഷേ കിട്ടി. അതും ഇവിടെ ഉള്ളതു തന്നെ.!വീട്ടുമുറ്റത്ത് ചെടിച്ചട്ടികളില്‍ വളര്‍ത്താറുണ്ട് ആഭരണച്ചെടിയായി. വ്രണരൂപിണി എന്നു സംസ്‌കൃതപേര,് രസം-തിക്ത, മധുരം ലഘുശീതഗുണം ശീതവീര്യം എന്നിങ്ങനെ ആ ചെടിയെപ്പറ്റിയുള്ള സമ്പൂര്‍ണ്ണ ഫോട്ടോ സഹിത വിവരണമുണ്ട്.സൈ
സൈഡ് ബാറുകളില്‍ ആയുര്‍വേദത്തിന്റെ ഭാവി തുടങ്ങി ധാരാളം ലേഖനങ്ങളുമുണ്ട്.

നീലക്കൊടുവേലി എന്ന കാല്‍പ്പനിക പുഷ്പം ഒളിപ്പിച്ചു വച്ചിരിക്കുന്ന കാണാതടാകം നെഞ്ചിലേറ്റിയ ഇല്ലിക്കല്‍ കല്ലിന്റെ നാട്ടുകാരിയായിരുന്നതു കൊണ്ട് നീലക്കൊടുവേലി കാണണമെന്ന് എനിക്കു മോഹമുദിച്ചു. അത് വെള്ളത്തില്‍ വളരുന്ന ചെടിയല്ലെന്നും കരയില്‍ വളരുന്ന കുറ്റിച്ചെടിയാ ണെന്നും മനസ്സിലാക്കുന്നു!.അതെന്തോ ആവട്ടെ എനിക്കിന്നും അതെന്റെ ആ പഴയ കാല്‍പ്പനികപുഷ്പം തന്നെ.

നമുക്കു ചുറ്റും നിറഞ്ഞു നില്‍ക്കുന്ന നാമറിയാത്ത നമ്മുടെ സസ്യസമൃദ്ധിയെപ്പറ്റി നല്ല അറിവു പകരുന്നു ആ സൈറ്റ്.

നമുക്കു പൂജയ്ക്കും മറ്റു മരുന്നുകള്‍ക്കുമായി എത്രയോ തുളസി വേണം, എന്തുകൊണ്ട് ഇതു വ്യാപകമായി ഇവിടെ കൃഷി ചെയ്യുന്നില്ല എന്നാലോചിച്ചിട്ടുണ്ട്. ഒരു സോപ്പു കമ്പനിക്കാര്‍ പറഞ്ഞത് അവര്‍ മഹാരാഷ്ട്രയില്‍ നിന്ന് തുളസി കൊണ്ടു വരുന്നു എന്നാണ്.ഇവിടെ മറ്റു കമ്പും കോലും തിരഞ്ഞുമാറ്റാത അതോടെയാണ് കിട്ടുക, വിലയും കൂടുതല്‍, അത്രയുമാവില്ല മഹാരാഷ്ട്രയില്‍ നിന്നു കൊണ്ടു വന്നാല്‍ എന്നാണ്.

സര്‍ക്കാര്‍ ഇത്തരം മരുന്നുകൃഷികളെ നന്നായി പ്രോത്സാഹിപ്പിക്കുന്നുണ്ട് ഇപ്പോള്‍. ധാരാളം സബ്‌സിഡി ഉണ്ട്. അത് എങ്ങനെ ചെയ്യാം എന്നതിനെപ്പറ്റി വിശദമായി പറയുന്നുണ്ട് കേരള ഹോര്‍ട്ടികള്‍ച്ചര്‍ മിഷന്റെ http://hortnet.kerala.nic.in/home.htm എന്ന സൈറ്റ്.മാര്‍ക്കറ്റ് പ്രൈസും നല്‍കിയിരിക്കുന്നു അവിടെ.

ഒരിക്കല്‍ കാര്‍ഷിക കോളേജില്‍ ഒരു സെമിനാറിനു പോയപ്പോള്‍ അവര്‍ പറഞ്ഞത് ആവശ്യം മനസ്സിലാക്കി കൃഷി ചെയ്യണം എന്നാണ്. ഉദാഹരണത്തിന് നീലിഭൃംഗാദി എണ്ണയ്ക്കു വേണ്ട എല്ലാ ചെടികളും ഒന്നിച്ചു വളര്‍ത്തുക, അപ്പോള്‍ ആവശ്യക്കാരുണ്ടാകും എന്നാണ്.

ദശപുഷ്പങ്ങളും അവയുടെ ഔഷധഗുണങ്ങളും വര്‍ണ്ണിക്കുന്ന ഫോട്ടോ സഹിത ബ്ലോഗുകളുണ്ട് ആഷാ സതീഷിനും ബിന്ദു കെ.പിയ്ക്കും. നേരത്തേ ഈ പംക്തിയിലൂടെ ആ ബ്ലോഗുകള്‍ പരിചയപ്പെടുത്തിയിട്ടുണ്ട്.

നമ്മുടെ ജൈവസമ്പത്തു നശിക്കാതിരിക്കാന്‍ നമുക്കു മുന്‍ കൈ എടുക്കാം.

(ഓണ്‍ലൈന്‍ ലിങ്കു നോക്കിയാല്‍ നീലക്കൊടുവേലി പടമുണ്ട്.)

കൊച്ചു കൊച്ചു സന്തോഷങ്ങള്‍

  (Online link-Published 05.03.2011)

കാരൂരിന്റെ 'മരപ്പാവകള്‍' മലയാളത്തിലെ എക്കാലത്തേയും മികച്ച ചെറുകഥകളില്‍ പെട്ട ഒന്നാണ്. കഥാനായിക നളിനി മരപ്പാവകളുണ്ടാക്കി വിറ്റ് അന്നത്തിനു വഴി തേടുന്നവള്‍, നിരവധി കയ്പ്പു നിറഞ്ഞ ജീവിതാനുഭവങ്ങള്‍ പേറുന്നവള്‍. പക്ഷേ അവള്‍ ഒരിക്കലും പ്രസാദാത്മകത്വം കൈ വെടിയുന്നില്ല, തളരുന്നുമില്ല. കഥയിലുടനീളം നിറഞ്ഞു നില്‍ക്കുന്ന നളിനിയുടെ ഈ പ്രസാദാത്മകത്വം, ജീവിതത്തോടുള്ള പോസ്റ്റീവ് സമീപനം ആണ് ആ കഥയുടെ ഹൈലൈറ്റ്. ടി.പത്മനാഭന്റെ ഗൗരിയും (പ്രകാശം പരത്തുന്ന പെണ്‍കുട്ടി) നമ്മുടെ മനസ്സുകളിലേക്ക് നേരേ നടന്നു കയറിയതിന് കാരണം മറ്റൊ ന്നല്ല.

http://groups.google.com/group/s29pensioners?hl=en എന്ന ഗൂഗിള്‍ ഗ്രൂപ്പില്‍ നിന്നുത്ഭവിച്ച് പല കൈ മറിഞ്ഞ് ഈയിടെ എന്റെ ഇ-മെയിലില്‍ വന്ന ഫോര്‍വേഡഡ് മെസേജിന്റെ സ്വതന്ത്ര മലയാള പരിഭാഷ -

ഒരു ദിവസം കണക്കു ടീച്ചര്‍ കുട്ടികളെ കണക്കു പഠിപ്പിക്കുന്നതിനു പകരം അവരോട് രണ്ടു നോട്ടുബുക്കു താളുകളിലായി തന്റെ മുഴുവന്‍ സഹപാഠികളുടെ പേരുകള്‍ ഇത്തിരി അകലമിട്ട്്് എഴുതുവാന്‍ പറഞ്ഞു.

അവരിലോരോ സഹപാഠിയേയും കുറിച്ച് ആലോചിച്ച്, അവരെ കുറിച്ച് തോന്നുന്ന ഏറ്റവും നല്ല കാര്യങ്ങള്‍ രേഖപ്പെടുത്തുവാനായിരുന്നു അടുത്ത നിര്‍ദ്ദേശം. കുട്ടികള്‍ കണക്കു പീരീഡ് മുഴുവനെടുത്ത് തങ്ങള്‍ക്കു നല്‍കിയ അസൈന്‍മെന്റ് ശ്രദ്ധയോടെ തീര്‍ത്തു ടീച്ചര്‍ക്കു നല്‍കി.

ശനിയാഴ്ച്ച ടീച്ചര്‍ ഓരോ കുട്ടിയുടെ പേരും ഓരോ കടലാസിലെഴുതി. അതിനടിയില്‍ ഓരോ സഹപാഠിയും ആ കുട്ടിയെ കുറിച്ചെഴുതിയത്് രേഖപ്പെടുത്തി. തിങ്കളാഴ്ച്ച ക്ലാസ്സില്‍ അത് വിതരണം ചെയ്തു. അധികം കഴിഞ്ഞില്ല, മുഴവന്‍ ക്ലാസുമുറിയും കുഞ്ഞുങ്ങളുടെ പുഞ്ചിരിയാല്‍ തിളങ്ങി.

'സത്യമോ?ഞാന്‍ ഒരിക്കലും വിചാരിച്ചില്ല ഞാന്‍ ആര്‍ക്കെങ്കിലും ആരെങ്കിലുമാണെന്ന്' 'മറ്റുള്ളവര്‍ എന്നെ ഇത്ര ഇഷ്ടപ്പെടുന്നുവെന്ന് ' എന്നായിരുന്നു മിയ്ക്കവരുടേയും പ്രതികരണങ്ങള്‍ . ക്ലാസ്സു മുറിയില്‍ പിന്നീടൊരിക്കലും അതു ചര്‍ച്ച ചെയ്തില്ല. അവര്‍ തങ്ങളിലോ അവരുടെ വീടുകളിലോ ചര്‍ച്ച ചെയ്തിരിക്കാം. പക്ഷേ ആ എക്‌സര്‍സൈസ് കൊണ്ടുദ്ദേശിച്ച ഫലം അതു നേടി. തങ്ങളെ തന്നെയും പരസ്പരവും സ്‌നേഹിക്കുന്ന കുട്ടികളുടെ ഒരു കൂട്ടം ഉണ്ടായി !

വര്‍ഷങ്ങള്‍ കഴിഞ്ഞു. ആ കൂട്ടത്തിലൊരാള്‍, സഞ്ചയ്, കാര്‍ഗില്‍ യുദ്ധത്തില്‍ വീരചരമം പ്രാപിച്ചു. രാജ്യം നല്‍കിയ ശവസംസ്‌ക്കാരത്തില്‍ ടീച്ചറും പങ്കെടുത്തു. എല്ലാവര്‍ക്കും അവസാനമായി ടീച്ചറും തന്റെ പൂര്‍വ്വവിദ്യാര്‍ത്ഥിക്ക്
അന്തോ്യപചാരം അര്‍പ്പിച്ചു.

ശവസംസ്്കാര ചടങ്ങിനു ശേഷം ഒരു ജവാന്‍ ടീച്ചറുടെ അടുത്തെത്തി. 'താങ്കളായിരുന്നോ സഞ്ചയ്‌യുടെ കണക്കു ടീച്ചര്‍? ടീച്ചര്‍ തലയാട്ടി. 'അവന്‍ ടീച്ചറെ കുറിച്ച് എന്നോടു ധാരാളം പറഞ്ഞിട്ടുണ്ട്.'

സഞ്ചയിന്റെ സ്‌കൂള്‍ സഹപാഠികള്‍ മിയ്ക്ക പേരും അച്ഛനമ്മമാരും ടീച്ചറോടു സംസാരിക്കാനെത്തി. അവന്റെ അച്ഛന്‍ ഒരു ചെറിയ തോലുറ കാട്ടി ടീച്ചറോടു പറഞ്ഞു 'ഇത് മരിച്ചപ്പോള്‍ അവന്റെ പോക്കറ്റില്‍ നിന്ന് അവര്‍ കണ്ടെടുത്താണ്. വളരെ സൂക്ഷിച്ച് മടക്കി ടേപ്പു ചെയ്‌തൊട്ടിച്ച പഴയ രണ്ടു നോട്ടുബുക്ക് കടലാസുകളായിരുന്നു അവ!സഞ്ചയിനെ കുറിച്ച് അവന്റെ സഹപാഠികള്‍ രേഖപ്പെടുത്തിയ നല്ല കാര്യങ്ങള്‍ ടീച്ചര്‍ എഴുതി കൊടുത്ത അതേ കടലാസുകള്‍!

'അങ്ങനെ ചെയ്തതിന് വളരെ നന്ദി, സഞ്ചയ് അതു നിധിയായി കരുതി സൂക്ഷിച്ചിരുന്നു ', അമ്മ പറഞ്ഞു.

' ഞാന്‍ ഇപ്പോഴും അതെന്റെ മേശവലിപ്പില്‍ ഭദ്രമായി സൂക്ഷിച്ചിട്ടുണ്ട്, അര്‍ജ്ജുനായിരുന്നു അപ്പറഞ്ഞത്.

'അതു ഞങ്ങളുടെ വിവാഹ ആല്‍ബത്തില്‍ സൂക്ഷിച്ചു വയ്ക്കുവാന്‍ പൃത്ഥ്വിരാജ് തന്നു' എന്നായി പൃത്ഥ്വിയുടെ ഭാര്യ.

'എന്റേതു ഡയറിയില്‍ ഞാന്‍ സൂക്ഷിച്ചിട്ടുണ്ട്' രശ്മി പറഞ്ഞു.

ദീപാലി ബാഗില്‍ നിന്ന് കീറിപ്പറിയാറായ അവളുടെ ലിസ്‌റ്റൈടുത്ത് ടീച്ചറെ കാണിച്ചു.'ഞാന്‍ ഇതെപ്പോഴും എന്റെ കയ്യില്‍ കൊണ്ടു നടക്കും'

കരയാനുള്ള ഊഴം ടീച്ചറിനായിരുന്നു ഇപ്പോള്‍. അവര്‍ സഞ്ചയിനും ഇനിയൊരിക്കലും അവര്‍ കാണാനിടയില്ലാത്ത അവന്റെ കൂട്ടുകാര്‍ക്കും വേണ്ടി കരഞ്ഞു.

നമുക്കു ചുറ്റുമുള്ളവരെ നമ്മള്‍ സ്‌നേഹിക്കുന്നുവെന്ന്, കരുതുന്നുവെന്ന്, അവര്‍ നമുക്ക് വേണ്ടപ്പെട്ടവരാണെന്ന്,നമ്മുടെ ആരോ ഒക്കെ ആണെന്ന് അവര്‍ അറിയണം. എന്താ അങ്ങനെയാവാന്‍ ശ്രമം ആരംഭിക്കുകയല്ലേ?'

തിരക്ക് പിടിച്ച് ജീവിതം ഓടിത്തീര്‍ക്കുന്നതിനിടയില്‍ ഇന്റര്‍നെറ്റിലൂടെയുള്ള ഇത്തരം സ്‌നേഹസന്ദേശങ്ങള്‍ ഒരു നിമിഷമെങ്കിലും നമ്മെ ചിന്തിപ്പിക്കും. നന്മ വിതച്ചാലല്ലേ നന്മ കൊയ്യാനാവൂ?മറ്റുള്ളവര്‍ക്ക്് നാം അങ്ങോട്ടു നല്‍കുന്നതല്ലേ തിരിച്ചും പ്രതീക്ഷിക്കാനാവൂ?




സര്‍ഗ്ഗസാങ്കേതികസംഗമം

(Online link-Published 26.2.2011)
2010 ലെ എനിക്ക് ഏറ്റവും ഇഷ്ടപ്പെട്ട മലയാളം കഥ വായിച്ചത് ആനുകാലികത്തിലല്ല, മറിച്ച് ഒരു ബ്ലോഗിലാണ്. സര്‍ഗ്ഗാത്മകതയും സാങ്കേതികതയും സമന്വിയിക്കുന്ന, സംഗമിക്കുന്ന, ശ്രീനാഥന്റെ 'സര്‍ഗ്ഗസാങ്കേതികം'(http://sargasankethikam.blogspot.com/ ) എന്ന ബ്ലോഗില്‍.ബ്ലോഗ് പേര് സുന്ദരം!

'എത്ര വേഗം മറക്കുന്നൂ നമ്മളീ ദുഃഖമൊക്കയും ബ്ലോഗിന്റെ ആഴിയില്‍ ' എന്ന സബ്‌ടൈറ്റില്‍. മോഹനകൃഷ്ണന്‍, ടി.പി.വിനോദ്, ഓ.എന്‍.വി, വൈലോപ്പിള്ളി, ഒളപ്പമണ്ണ, കീറ്റസ്, സച്ചിദാനന്ദന്‍ എന്നിവരുടെ ഹൃദ്യ മധുരവചനാമൃതം പേറുന്ന സൈഡ്ബാര്‍. 'അനന്ത ബസ് ബാറുകളില്‍ പ്ലവനം ചെയ്യുന്ന ആള്‍ട്ടര്‍നേറ്ററുകള്‍ക്ക് 'എന്നു സമര്‍പ്പണം തുടങ്ങിയ പോസ്റ്റകളിലൂടെ...

സ്വയം കളിയാക്കാനുള്ള കഴിവ് വലിയൊരു പ്രത്യേകതയാണ്. 'സമ്മേളനം' എന്ന ആക്ഷേപഹാസ്യത്തില്‍ നിന്ന്്- 'സമ്മേളനം രണ്ടു മണി കടന്നപ്പോള്‍ പ്രതിനിധി വയറു പുകഞ്ഞ് ആലോചിച്ചു. സാമ്രാജ്യത്വ വിരുദ്ധമായ സാമ്പാര്‍, വര്‍ഗ്ഗീയ വിരുദ്ധമായ അവിയല്‍, സ്ത്രീപക്ഷ മധുരക്കറി, നോണ്‍ വെജിറ്റേറിയന്‍ സ്വത്വബോധമുണര്‍ത്തുന്ന ചിക്കനും മീനും, ദേശീയബോധം ഊട്ടിയുറപ്പിക്കാന്‍ ബട്ടൂര, ആഗോളവല്‍ ക്കരണത്തിന്റെ ഭാഗമായി അല്‍പ്പം ചൈനീസ് ബുഫെയുടെ വികേന്ദ്രീകരണം, ജനാധിപത്യവല്‍ക്കരണം. അറിയിപ്പു വന്നു, ഭക്ഷണത്തിനു ശേഷം ആരും മുങ്ങരുത്, സമ്മേളനാനന്തരം, യുജിസി (പുതിയ സ്‌കെയില്‍) വിതരണം ഉണ്ടായിരിക്കുന്നതാണ്.' ു

ശമ്പളാനുകൂല്യങ്ങളോടെയുള്ള മദ്ധ്യവേനല്‍ കാലം അവസാനിക്കുന്നതിന്റെ കലിപ്പ് വളരെ സരസമായി പറഞ്ഞിരിക്കുന്ന 'ദേ, പിന്നേം തുടങ്ങീ...' ചിരിപ്പിച്ച് തുടങ്ങി ചിന്തിപ്പിച്ചവസാനിപ്പിക്കുന്നു. ' ജൂണ്‍ ഒന്നാണിന്ന്. ഈ മാഷമ്മാ രുടെ ഒരു കഷ്ടപ്പാട് മാളോര്‍ക്കറിയാമോ? രണ്ട് മാസത്തെ കുശാലായ അവധിപ്പൊറുപ്പാണ് വെടി തീരാന്‍ പോകുന്നത്.' തുടര്‍ന്നു വായിക്കുക.

എന്‍ജിനീയറിംഗ് കോളേജുകള്‍ ഇപ്പോള്‍ കൂണു പോലെ. എന്നാല്‍ കോളേജില്‍ പല പേപ്പറുകള്‍ പോയി എങ്ങുമെത്താതായവരുണ്ട്, മുഴുമിക്കാന്‍ പാടു പെടുന്നവരുണ്ട്. അങ്ങനെയുള്ളവരെക്കുറിച്ചുള്ളതാണ് 'ഇന്ദു പറഞ്ഞു തന്ന പാഠം'. അത്തരക്കാരില്‍ പലരുടേയും ജീവിതവിജയ ഗാഥകള്‍ കോറിയിട്ട് വിദ്യാര്‍ത്ഥികളില്‍ ആത്മവിശ്വാസം ജനിപ്പിക്കുക എന്ന സ്വധര്‍മ്മം ഇവിടെ കൃത്യമായി നിര്‍വ്വഹിക്കുന്നു .അതിലെ ഒരു കമന്റ് -'നന്നായി എഴുതി മാഷേ. നല്ല ചിന്തകള്‍. .ജീവിതാവസ്ഥകള്‍ക്ക് കുട്ടികളെ പ്രചോദിപ്പിക്കാന്‍ കഴി യുന്നതിനേക്കാള്‍ ഒരദ്ധ്യാപകനു കഴിയും. ഇഷ്ട്ടപ്പെട്ടു..:) ഒരു എന്‍ജിനീയറിംഗ് കോളേജ് ഡ്രോപ് ഔട്ട്'

വലിയ ഭാഷാപ്രേമിയാണ് ശ്രീനാഥന്‍. 'ഉണ്ണായി വാര്യരുണ്ടായതെവിടെ' എന്ന കനപ്പെട്ട ലേഖനത്തില്‍ നിന്ന ്' നളചരിതവുമായി ബന്ധപ്പെട്ട് ചില ഗവേഷണങ്ങള്‍ നടത്തിയപ്പോളാണ് ഉണ്ണായിവാര്യരുടെ ജന്മസ്ഥലത്തെ കുറിച്ച് ചില സൂചനകള്‍ എനിക്ക് ലഭ്യമായത്. കിം ബഹുനാ, അത് ബ്ലോഗിലൂടെ പങ്കു വെച്ചാല്‍ ഭാഷാവിദ്യാര്‍ത്ഥികള്‍ക്കും, മറ്റു സഹൃദയര്‍ക്കും ഉപകാരപ്രദമായിരിക്കും എന്നു കരുതി.'

'കവിത അറിയാതെ പോകുന്ന കാമ്പസ്സ് ' എന്ന ഈടുറ്റ ലേഖനവും അതിലെ ആവേശഭരിതമായ ചര്‍ച്ചകളും വായനാസാഹിത്യകുതുകികള്‍ കുറവല്ല എന്ന ആഹ്ലാദകരമായ തിരിച്ചറിവു നല്‍കുന്നു. പുതിയ എഴുത്തുകാരുടെ ലിങ്കുകള്‍ സഹിതമുള്ള ലിസ്റ്റുമുണ്ട്..

ഏകമകനെ പഠിക്കാനായി ദൂരെ വിട്ട് അച്ഛനമ്മമാര്‍ അനുഭവിക്കുന്ന വിരഹദുഖമാണ് ' ശ്രീശൈലത്തിലെ കുട്ടി'. കണ്ണു നനയിച്ചൊരു പോസ്റ്റ്.

ഇനി മുന്‍ചൊന്ന 'സിഗ്നല്‍സ് ആന്‍ഡ് സിസ്റ്റംസ്' എന്ന, സൈന്‍വേവ് ഗ്രാഫ് വരച്ചിട്ടിരിക്കുന്ന നല്ല കഥയെപ്പറ്റി. വേവ് സാംപ്ലിംഗ് അനാലിസിസ് ക്ലാസ്സിലിരിക്കുന്ന എന്‍ജിനീയറിംഗ് വിദ്യാര്‍ത്ഥി റോബിന്‍ ബോറന്‍ ക്ലാസ്സിനിടയില്‍ തന്റെയും കൂട്ടുകാരുടേയും ജീവിതങ്ങളുടെ സാംപ്ലിംഗ് നടത്തുകയാണ്.

' കഴിഞ്ഞകുറി ടെസ്റ്റിനു മാര്‍ക്കു കുറഞ്ഞപ്പോള്‍ വിളിക്കേണ്ടി വന്നതിന് അമ്മയുടെ വിശ്വരൂപം ദര്‍ശിച്ചതാണ്. അമ്മ സ്വയം നിര്‍ത്താതെ സംസാരിച്ചു കൊണ്ട്, തെരുതെരെ പണിചെയ്ത് തീര്‍ത്ത് ഒരു അസംതൃപ്തിുഞ്ഞമ്മ യായി ഓഫീസിലേക്കോടുന്ന യന്ത്രം. ഇതിനിടയില്‍ ഇമ്പള്‍സുകള്‍ പോലെ ഉയരുന്ന ശാപവാക്കുകള്‍. അല്ല, ആരാണ് അമ്മയുടെ ഫൂറിയര്‍ സ്‌പെക്ട്രത്തില്‍ സ്‌നേഹത്തിന്റെ അനന്ത ഫ്രീക്വന്‍സികള്‍ കണ്ടെത്തിയത്?' അസംപ്തൃപ്തിക്കുഞ്ഞമ്മ, അര്‍ജ്ജുനപ്പത്ത് തുടങ്ങി പുതിയ ഭാഷാപ്രയോഗങ്ങള്‍ നന്ന്.പ്രണയം, വിപ്ലവം, ദാരിദ്യം എന്നു വേണ്ടാ ,സമകാലികജീവിതം എല്ലാമുണ്ട് ഈ കഥയില്‍. തികച്ചും വ്യത്യസ്തവും മനോഹരവുമായ ആഖ്യാനശൈലി. ടെക്‌നിക്കല്‍ വാക്കുകളുടെ അതിപ്രസരം ഉണ്ടെങ്കിലും അതൊന്നും അറിയാത്തവര്‍ക്കും കഥ മനസ്സിലാകും എന്ന് അതിലെ കമന്റുകള്‍ സാക്ഷ്യപ്പെടുത്തുന്നു. ഈ കഥ വായിക്കുമല്ലോ അല്ലേ?

സൗഭാഗ്യവാന്‍, ഇലയനക്കങ്ങള്‍, കവിത-നെരൂദ എന്നിങ്ങനെ കവിതകളുമുണ്ട്, പക്ഷേ അത് പൂര്‍ണ്ണമായും ഉള്‍ക്കൊള്ളാന്‍ കഴിഞ്ഞു എന്നു പറയാനാവില്ല, അതിനുള്ള വിവരം എനിക്കില്ല തന്നെ!അല്ലെങ്കിലും ഈ ബ്ലോഗു വായിക്കുമ്പോഴെല്ലാം ഞാന്‍ എന്റെ ഭാഷാവിജ്ഞാനപരിമിതികള്‍ അറിയുന്നു !

'കെട്ട ജീവിതം, ഉണ്ടെനിക്കെന്നാല്‍, മറ്റൊരു സൈബര്‍ ജീവിതം മന്നില്‍' എന്നു പാടുന്ന ശ്രീനാഥന്റെ സര്‍ഗ്ഗസാങ്കേതികതൂലിക ഇനിയും നിര്‍ബാധം ചലിക്കട്ടെ, നമുക്കായ്.

സൗമ്യമല്ല ഈ പ്രതികരണങ്ങള്‍

(Online link-Published 19.02.2011)
ഐവര്‍മഠത്തില്‍ മുഴങ്ങിയ ശാന്തിമന്ത്രങ്ങള്‍ ഏറ്റുവാങ്ങി സൗമ്യയുടെ ആത്മാവ് ബലാല്‍സംഗികളും ഞരമ്പുരോഗികളുമില്ലാത്ത ലോകത്തിലേക്കു പറന്നുയര്‍ന്നുകഴിഞ്ഞു. കേരളത്തെ കരയിപ്പിച്ച ആ സംഭവം ഒരു പുതുവാര്‍ത്തയ്ക്കും മായ്ക്കാന്‍ കഴിയാത്ത വിധം ഇവിടുത്തെ പെണ്‍മനസ്സുകളില്‍ ഉണങ്ങാത്ത വ്രണമായി എക്കാലവും നില്‍ക്കും.

ഇതേ കുറിച്ച് പ്രശസ്തരുടെ പ്രതികരണങ്ങള്‍ നമ്മള്‍ കേട്ടു.ലോകമെമ്പാടും ചിതറി കിടക്കുന്ന, സാധാരണക്കാരായ മലയാളികളുടെ പ്രതികരണങ്ങള്‍ ഇന്റര്‍നെറ്റ് വഴി ബ്ലോഗ്-ബസ്- സോഷ്യല്‍ നെറ്റവര്‍ക്കിംഗ് സൈറ്റുകളിലൂടെ ഒഴുകുകയാണ്. പല ഗൂഗിള്‍ ബസ്സുകളില്‍ നിന്ന് എടുത്ത്് ബ്ലോഗര്‍ ആഗ്നേയ ഇട്ട ഒരു പോസ്റ്റാണിത് - http://gayaathiyilninnum.blogspot.com/. വായിക്കാം, ഒട്ടും സൗമ്യമല്ലാത്ത, പെണ്‍മനസ്സുകളുടെ ധര്‍മ്മരോഷങ്ങള്‍.

' സത്യമായും ഞങ്ങളുടെ ജീവനു ചാരിത്ര്യത്തേക്കാള്‍ വിലയുണ്ട് '

'അവളുപോയതു നന്നായി'-ചര്‍ച്ചകള്‍ക്കും രോഷപ്രകടനങ്ങള്‍ക്കുമൊടുവില്‍ ദീര്‍ഘനിശ്വാസമുതിര്‍ത്തുകൊണ്ട് എല്ലാവരുടെയും ആത്മഗതം..സമൂഹത്തില്‍ നാളെയവളുടെ ഗതി എന്തായിരിക്കുമെന്നോര്‍ത്തുതന്നെയാവും എല്ലവരുമതു പറഞ്ഞിരിക്കുക..ഒരുപക്ഷേ അവളുടെ സ്വന്തം വീട്ടുകാര്‍പോലും ഓര്‍ത്തിരി ക്കാമിത്.എന്തായാലും പുതിയതലമുറയിലെ പെണ്‍കുട്ടികള്‍ ജീവനിലും വലുതായി മാനത്തെ കാണുന്നില്ലെന്നത് ആശാസകരം. ഇന്നിറങ്ങിയ ചില ഗൂഗിള്‍ ബസ്സുകളിലെ പെണ്‍കുട്ടികളുടെ പ്രതികരണങ്ങള്‍ ആശാവഹമാണ്.

1. 'നാളെ ആ പെണ്‍കുട്ടിയുടെ അവസ്ഥ എനിക്ക് വന്നാല്‍ , എനിക്കല്‍പ്പമെ ങ്കിലും ശ്വാസം ബാക്കിയുണ്ടെങ്കില്‍ ,ഞാന്‍ പരിക്ക് ഭേദമായി എഴുന്നേറ്റ് വരാ നേ നിങ്ങള്‍് പ്രാര്‍ഥിക്കാവൂ. സമൂഹത്തിന്റെ അപമാനിക്കല്‍ സഹിക്കാതിരിക്കാന്‍ ഞാന്‍ മരിക്കുന്നതാണ് നല്ലതെന്ന് നിങ്ങള്‍ പ്രാര്‍ത്ഥിച്ചാല്‍, അപമാനി ക്കപ്പെട്ട ഞാന്‍ ആത്മഹത്യ ചെയ്യുന്നതാണ് നല്ലതെന്ന് നിങ്ങള്‍ പറഞ്ഞെ ന്നേ എനിക്ക് കരുതാനാവൂ. ഞാന്‍ മറിച്ച് തീരുമാനിക്കാത്തിടത്തോളം കാലം ഈ ലോകത്ത് ജീവിക്കാന്‍ എനിക്കും അഗ്രഹമുണ്ട്, അവകാശവും'-പ്രിയ

2.'സഹായിക്കാനായി കൈ നീട്ടിയില്ലെങ്കിലും ശരി, എങ്ങനെയെങ്കിലും തനിയെ എഴുന്നേല്‍ക്കാന്‍ ശ്രമിച്ചു കൊള്ളാം.. പക്ഷെ ദയവായി സഹതപിച്ചു കൊല്ലരുത്..' -കൊച്ചുത്രേസ്യ

3.'ആ പെണ്‍കുട്ടി മരിച്ചൂല്ലേ.? അപ്പോ ഓള്‍ മോസ്റ്റ് ശവമായി കിടന്ന പെണ്‍ കൊച്ചിനെ ആണ് അയാള്‍ പ്രാപിച്ചത്.കഷ്ടം! ജീവനുണ്ടോ ശവമാണോ... ഒന്നും പ്രശ്‌നമല്ല... ചുമ്മാ കേറ്റാനൊരു വജൈന വേണം..ദാറ്റ്‌സ് ഇറ്റ്. നമ്മുടെ നാട്ടില്‍ അമ്മത്തൊട്ടിലൊക്കെ വച്ചിരിക്കുന്നത് പോലെ, എല്ലാ ബസ് സ്റ്റാന്റ്റിലും പൊതു സ്ഥലങ്ങളോടനുബന്ധിച്ചും, ട്രെയിനിലുമൊക്കെ വല്ല പ്ലാസ്റ്റിക്കിലോ റെക്‌സിനിലോ തീര്‍ത്ത സ്ത്രീ രൂപങ്ങള്‍ (സെക്‌സ് റ്റോയ് പോലെ ) ഉണ്ടാക്കി വയ്ക്കട്ടെ. സോക്കേട് തീര്‍ക്കേണ്ടവര്‍ക്ക് അതേല്‍ പോയി തീര്‍ക്കാമല്ലോ.. സോറി ഫോര്‍ മൈ ലാംഗ്വേജ്... സങ്കടം സഹിക്ക വയ്യാഞ്ഞിട്ടാ'-സുജ. (ഇല്ല സുജ, ഇക്കാര്യത്തില്‍ പറഞ്ഞ ഭാഷയെപ്പറ്റി ക്ഷമ ചോദിക്കേണ്ട ആവശ്യം ഒട്ടുമില്ല-ശ്രീലത).

അതേ, നിങ്ങളൊക്കെ ഞങ്ങളുടെ തലയില്‍ അടിച്ചേല്‍പ്പിച്ച ആ മാനത്തേ ക്കാളും ചാരിത്ര്യത്തേക്കാളും വിലയുണ്ട് ഞങ്ങളുടെ ജീവന്, ജീവിതത്തിന്. നിങ്ങളിലൊരാള്‍ കാണിക്കുന്ന മാനസിക വൈകല്യത്തിന്, ചെറ്റത്തരത്തിനു പകരമായി ഞങ്ങളൊക്കെ ജീവിച്ചിരിക്കാനും, സ്വസ്ഥമായി ജീവിക്കാനുമുള്ള അവകാശം വലിച്ചെറിയണോ? എന്റെ മകളുടെ കാലത്തെങ്കിലും ഇതിനൊര റുതിയുണ്ടായെങ്കില്‍. ജിവിതത്തോടും, ലോകത്തോടും അടങ്ങാത്ത കൊതിയുള്ളവരാണു ഞങ്ങളും.

തനിക്കുനേരെ ലൈംഗിക അതിക്രമണം നടന്നപ്പോള്‍, അതിന്റെപേരില്‍ വീട്ടുകാരടക്കം കയ്യൊഴിഞ്ഞപ്പോള്‍ തളരാതെ പിടിച്ചുനിന്ന് ഒടുവില്‍ ഇന്ത്യയിലെ ലൈംഗികചൂഷണങ്ങള്‍ക്കുനേരെയും, ബാലവേശ്യാ വൃത്തിക്കെതിരേയും പോരാടാന്‍ ധൈര്യം കാണിച്ച, പോരാടിക്കൊണ്ടിരിക്കുന്ന സുനിതാകൃഷ്ണനു സലാം. (സങ്കടം തീരുന്നില്ല..പേടിയും)'

ഇനി മുന്‍കരുതല്‍. ബ്ലോഗര്‍ ഇഞ്ചിപ്പെണ്ണിന്റെ ബസ്സില്‍ നിന്ന് -''ട്രെയിന്‍ യാത്രയ്ക്കിടയില്‍ സ്ത്രീകളെ സഹായിക്കാന്‍ വേണ്ടി 24 മണിക്കൂറും പ്രവര്‍ത്തിക്കുന്ന റയില്‍വേ അലേര്‍ട്ട് നമ്പരുകള്‍- 9846200100 /9846200150 /9846200180. ട്രെയിന്‍ യാത്ര ചെയ്യുന്ന പെണ്‍കുട്ടികള്‍ തീര്‍ച്ചയായും ഈ നമ്പരുകള്‍ കൈവശം സൂക്ഷിക്കുക'

ആദ്യ വികാരവിക്ഷോഭങ്ങള്‍ അടങ്ങിയപ്പോള്‍ കോയമ്പത്തൂര്‍കാരന്‍ ഒറ്റക്കയ്യന്‍ ഭീകരന്‍ ഗോവിന്ദച്ചാമിയുടെ സ്ഥാനത്ത് പിടിപാടുള്ള ഒരു മലയാളിയായിരുന്നുവെങ്കില്‍ എന്തായിരുന്നിരിക്കും സംഭവിച്ചിരിക്കുക എന്ന് ഞാനും ആലോചിച്ചു പോയി. ഇനിയും ഇത്തരം ദാരുണസംഭവങ്ങള്‍ ആവര്‍ത്തിക്കാതിരിക്കാന്‍ എന്താണു ചെയ്യേണ്ടെതെന്നും. 'ധാര്‍മ്മിക രോഷം ഉണര്‍ന്നു' എന്ന ഫെബ്രുവരി 8-ാം തീയതിയിലെ ബസ്സില്‍ പ്രശസ്ത ബ്ലോഗര്‍ ബെര്‍ലി തോമസ് ഇക്കാര്യങ്ങള്‍ യുക്തിഭദ്രമായി കോറിയിട്ടിട്ടുണ്ട്. വായിച്ചിരിക്കണം തീര്‍ച്ചയായും. പ്രൊഫെല്‍ -http://www.google.com/profiles/103520254487286868168#buzz

സൗമ്യയ്ക്കുവേണ്ടി ഉപവാസമനുഷ്ഠിച്ച വീട്ടമ്മയെപ്പറ്റി വായിച്ചത് പ്രശസ്ത കഥാകൃത്തും എന്റെ നല്ല ബ്ലോഗ് സുഹൃത്തുമായ ശ്രീ. സുസ്‌മേഷ് ചന്ത്രോത്തിന്റെ ' ഇപ്പോള്‍ ആ മൃതദേഹം പുഞ്ചിരിക്കുകയായിരിക്കും' എന്ന ഹൃദയത്തില്‍ തൊട്ട വരികളില്‍ - http://susmeshchandroth.blogspot.com/- നിന്നാണ്. വായിക്കുമല്ലോ അല്ലേ?



നക്ഷത്രങ്ങള്‍ പറയുന്നത്

(Online link-published 19.02.2011)
തീക്കുറുക്കനില്‍ (മോസിലയുടെ ഫയര്‍ഫോക്‌സ് എന്ന ഇന്റര്‍നെറ്റ് സെര്‍ച്ച് എന്‍ജിന്‍) ആസ്‌റ്റ്രോളജി എന്നു തെരഞ്ഞപ്പോള്‍ 07 സെക്കന്റിനകം 2,74,0000 റിസല്‍റ്റ്‌സ എന്നു കാണിച്ചു. അതിനേക്കാള്‍ ഹിറ്റുള്ള വേറേ വാക്കുകള്‍ ഉണ്ട്. അത് തല്‍ക്കാലം നില്‍ക്കട്ടെ, നമുക്ക് ഇന്ന് അല്‍പ്പം ഭാവികാര്യം ചിന്തിക്കാം.

ദൈവം എന്നാല്‍ കാലം എന്നര്‍ത്ഥം. ഭാവി എന്ന പ്രഹേളികയാണ്് നമ്മെ കാലത്തെ അറിയുന്നവര്‍ അഥവാ ദൈവജ്ഞര്‍ എന്ന ജ്യോതിഷികളുടെ അടുത്ത് എത്തിക്കുന്നത്. ഇതു കൂടാതെ പാമിസ്റ്റ്രി, ന്യൂമറോളജി, ടാററ്റ് കാര്‍ഡ്‌സ് അങ്ങനെ അങ്ങനെ ഭാവി കുരുക്കഴിക്കാനുള്ള ശ്രമവഴികള്‍ ഇനിയും എത്ര?

ഇപ്പോഴിതാ, സൂര്യചാരം അനുസരിച്ച് 12 രാശികളിലായി വിഭജിച്ചിരുന്ന നക്ഷത്രക്കൂട്ടങ്ങളുടെ കൂട്ടത്തിലേക്ക് Ophichus അഥവാ Serpentarius (സര്‍പ്പധരന്‍ ? ) എന്ന ഒരു പുതുനക്ഷത്രക്കൂട്ടം കൂടി ചേര്‍ന്ന് 13 ആയി മാറിയിരിക്കുന്നു രാശികള്‍. ഇനിയിപ്പോള്‍ ' ഓ, നല്ല ആജ്ഞാശക്തിയാണ്, ടിപ്പിക്കല്‍ ലിയോ ( ചിങ്ങം)' എന്നെല്ലാം പറയാന്‍ വരട്ടെ, അയാള്‍ ഇപ്പോള്‍ ലിയോ മാറി കാന്‍സര്‍ (കര്‍ക്കിടകം) ആയിട്ടുണ്ടാവാം! നവം 29നും ഡിസം 17നും ഇടയ്ക്ക് ജനിച്ചവരെങ്കില്‍ നിങ്ങള്‍ ഇപ്പോള്‍ സ്‌കോര്‍പ്പിയന്‍ (വൃശ്ചികം) അല്ല, ഒഫ്യൂക്കസുകാരാണ് !അതിന്റെ ട്രെയിറ്റ്‌സ് ആരെങ്കിലും ഒന്നെഴുതി പിടിപ്പിക്കും വരെ കാത്തിരിക്കുക, നിങ്ങള്‍ക്കു നിങ്ങളെ അറിയാന്‍!

ഇതെല്ലാം എങ്ങനെ സംഭവിച്ചു എന്നറിയണ്ടേ?അറിയാമല്ലോ, നേരിട്ട് കുതിരമുഖത്തു നിന്നു തന്നെ!(Right from the horse's mouth എന്നതിന്റെ പരിഭാഷയാണേ!) മിനെസോട്ട പ്ലാനറ്റേറിയം സൊസൈറ്റിയിലെ പ്രൊഫ:Park Kunkle യുമായുള്ള അഭിമുഖം, http://hubpages.com/hub/The-New-Zodiac-Dates വഴി പോയി ഫോക്‌സ് 9 ന്യൂസ് ക്ലിക്കു ചെയ്താല്‍ കേള്‍ക്കാം. ജ്യോതിശാസ്ത്രജ്ഞര്‍ സയന്‍സ് അധിഷ്ഠിതമായി നക്ഷത്രങ്ങള്‍ നിരീക്ഷിക്കട്ടെ, ജ്യോതിഷികള്‍ മനുഷ്യനും സൗരയൂഥവും തമ്മിലുള്ള മിസ്റ്റിക് ബന്ധത്തിന്റെ ചുരുളഴിക്കാന്‍ ശ്രമിക്കട്ടെ! നമുക്ക് വായിച്ച് വായിച്ച് പോകാം!

വിക്രമാദിത്യസദസ്സിലെ വരരുചിയില്‍ തുടങ്ങിയ പറയിപെറ്റ പന്തിരുകുലമുള്ള നമ്മള്‍ കേരളീയര്‍ക്ക് ജ്യോതിഷം നിഷേധിക്കാനാവില്ല തന്നെ.അങ്ങനെ ചെയ്യേണ്ട ആവശ്യവുമില്ല. മരത്തിലിരിക്കുന്ന കാക്കയെ ലക്ഷണം വച്ച് ,പോകുന്ന ദിക്കില്‍ നിന്ന് പാല്‍പ്പായസം കിട്ടുമെന്നും, എന്നാല്‍ ഉണങ്ങിയ കമ്പിലാണ് കാക്ക ഇരിക്കുന്നതെന്നതിനാല്‍ പായസം കരിഞ്ഞതായിരിക്കുമെന്നും ചൊല്ലിയ 'ഐതിഹ്യമാല'കഥാപാത്രങ്ങള്‍ നമ്മുടെ ആത്മാവിന്റെ ഭാഗമല്ലേ?

എന്നാല്‍ ചോദ്യം ചെയ്യപ്പെടാനാവാത്തതായി ഒന്നുമില്ലെന്നും അന്ധമായി ഒന്നും വിശ്വസിക്കേണ്ടതില്ലെന്നും നാം അറിയുകയും വേണം. ഇതുവരെ ലോകത്തു സംഭവിച്ചതെല്ലാം, ഇനി സംഭവിക്കാന്‍ പോകുന്നതെല്ലാം പണ്ട് ഭാരതത്തിലെ 'ഋഷിവര്യന്മാര്‍' പറഞ്ഞുവച്ചതാണ് എന്ന് ഉരുവിട്ടിരുന്നാല്‍ യുക്തിബോധമുള്ള പുതുതലമുറക്കാര്‍ അതു സമ്മതിച്ചെന്നു വരില്ല. ശ്രീ .ഉമേഷിന്റെ http://malayalam.usvishakh.net/blog/ എന്ന ബ്ലോഗിലെ 16. 04.2010 ലെ പിഡിഎഫ് രൂപത്തിലുള്ള പുസ്തകം താത്പര്യമുള്ളവര്‍ക്ക് വായിക്കാം. മൂന്നു പേര്‍ ചേര്‍ന്നെഴുതിയ വളരെ വിജ്ഞാനപ്രദമായ ഒരു രേഖയാണത.്

ഇനിയിപ്പോള്‍ ടാരറ്റ് കാര്‍ഡ് നോക്കി ഭാവി അറിയണമോ, എങ്കില്‍ ഈ വഴി ഒന്നു പോയി നോക്കൂ- http://www.indianastrology.com/. തെറ്റോ ശരിയോ ,എങ്ങനെ, എന്തുകൊണ്ട് എന്നെല്ലാം സ്വയം ഉത്തരം കണ്ടെത്തുക.

ബ്ലോഗര്‍ കൊച്ചുത്രേസ്യയുടെ രണ്ട് ഗൂഗിള്‍ ബസ്സുകളാവട്ടെ (http://www.google.com/profiles/113713421837162689629#buzz ) ഇനി.
1.സോഡിയാക് സൈന്‍ മാറിയതിനെ കുറിച്ചുള്ള ജനുവരി 21 ലെ ബസ്്-

'എപ്പോ വേണേലും കാലുമാറാവുന്ന സോഡിയാക് സൈനും കൊണ്ട് ജീവിക്കാന്‍ വല്യ ബുദ്ധിമുട്ടായതു കൊണ്ട് ഞാന്‍ സ്വന്തമായി ഒരു സോഡിയാക് സൈനുണ്ടാക്കിയതായി പ്രഖ്യാപിച്ചു കൊള്ളുന്നു ത്രേസ്യൂസ്.. ബര്‍ത്ത്പക്ഷി-ചിക്കന്‍, ബര്‍തസിംബല്‍- തീയ്ക്കകത്തിരുന്ന് കപ്പലണ്ടി കൊറിയ്ക്കുന്ന ഫീനിക്‌സ് (മാനിന്റെ ഫേസ്‌കട് ഉള്ളത്),ബര്‍ത്ത് മൃഗം position vacant , ബര്‍ത് സ്‌റ്റോണ്‍- വജ്രം, കരിങ്കല്ല്,വെട്ടുകല്ല് (അവനവന്റെ കപ്പാകുറ്റി അനുസരിച്ച് തെരഞ്ഞെടുക്കുക). ബര്‍ത്ത്ഫുഡ്-പുട്ട് ' .

2.ഈ ന്യൂമറളോജി ബസിന് പ്രചോദനം ആയത്  വാരികയില്‍ സിനിമാതാരംമായുള്ള ഇന്റര്‍വ്യൂ.

' ഒരു സിലുമാനടിക്കൊച്ചുമായുള്ള അഭിമുഖം വായിച്ചു തീര്‍ത്തു.. കൊച്ചിന്റെ ശരിക്കും പേര്‍ ആയില്യാന്ന്.. സിനിമേ കേറീപ്പോ ന്യൂമറോളജി പ്രകാരം അതിനു നെഗറ്റീവ് വൈബ്രേഷന്‍ ഉണ്ടെന്നു കണ്ട് അതു മാറ്റി നിവേദ എന്നിടാന്‍ വിചാരിച്ചപ്പോ അതിനും ആ ഓളജി പ്രകാരം അതേ വൈബ്രേഷന്‍.. അവസാനം അനന്യയിലുറപ്പിച്ചത്രേ.. സിലുമേ കേറുന്നതിനു മുന്‍പ് അമ്പെയ്തില്‍ വല്യ വല്യ സമ്മാനമൊക്കെ കിട്ടീട്ടുള്ള കൊച്ചാണത്രേ.. അപ്പോഴൊന്നും ഈ വൈബ്രേഷനില്ലായിരുന്നോ പോലും.. അതോ കലാപരമായ മേഖലകളെ മാത്രം ഡിറ്റക്ട് ചെയ്ത് വൈബ്രേറ്റ് ചെയ്യുന്നതോ.. എന്തായാലും ടെന്‍ഷനായി.. എന്റെ പേരു വല്ല ന്യൂമറോളജിക്കാരുടേം കണ്ണില്‍ പെട്ടാലോ.. വൈബ്രേഷനു പകരം വല്ല ഭൂമികുലുക്കോം അതില്‍ കണ്ടു പിടിച്ചാലോ.. എന്റെ ന്യൂമറോളജി കടവുള്‍സ്..പ്‌ളീസ് കാപ്പാത്ത്...'

Sunday, March 13, 2011

അങ്കിളിന് ആദരപൂര്‍വ്വം...

 (Online link-Published 05.02.2011)

ടി.വിയില്‍ പൊതുമരാമത്തുവകുപ്പിലെ പകല്‍കൊള്ളയെപ്പറ്റി മൊബൈല്‍ ഫോണ്‍ സംഭാഷണം സഹിതമുള്ള വാര്‍ത്തകള്‍ വന്നുകൊണ്ടിരിക്കുന്നു. സ്വിസ്സ് ബാങ്കിലെ ഇന്‍ഡ്യന്‍ നിക്ഷേപത്തെപ്പറ്റിയും കേള്‍ക്കുന്നുണ്ട്.

സ്വാഭാവികമായും ഈ വാര്‍ത്തകള്‍ എന്നെ ബൂലോകത്തെ അങ്കിളിനെ ഓര്‍മ്മിപ്പിച്ചു. ഈ ജനുവരിയില്‍ അപ്രതീക്ഷിതമായി ഈ ലോകത്തു നിന്നു വിടപറഞ്ഞ 'അങ്കിള്‍ ' എന്ന ശ്രീ. സി.പി.ചന്ദ്രകുമാറിന്റെ കാര്യമാത്രപ്രസക്ത മായ ബ്ലോഗുകളിലൂടെ ഒരു യാത്ര. ഇനി ഒരിക്കലും അവിടെ പുതിയ പോസ്റ്റുകള്‍ ഉണ്ടാവില്ല. പക്ഷേ എഴുതിയിട്ടവയത്രയും ഏറെ വിലപ്പെട്ടവ തന്നെ..

സര്‍ക്കാര്‍ കാര്യം-( http://sarkkaarkaryam.blogspot.com/ ) -'സര്‍ക്കാര്‍ സ്ഥാപനങ്ങള്‍ പൊതുഖജനാവിനുണ്ടാക്കുന്ന ആഘാതങ്ങളെപ്പറ്റി ഒരു അന്വേഷണം' എന്ന് ഹെഡറില്‍ കുറിച്ചിരിക്കുന്നു.

അവസാന പോസ്റ്റ് 2 G സ്‌പെ്ക്ട്രം കുംഭകോണത്തെപ്പറ്റിയാണ്. സ്‌പെക്ട്രം എന്നാല്‍ എന്ത് എന്നു തുടങ്ങി ജോയിന്റ് പാര്‍ലമെന്ററി കമ്മിറ്റി ഏറ്റെടുത്ത പഴയ കേസുകളുടെ ചരിത്രത്തിലൂടെ കടന്ന് ഈ വിഷയത്തെക്കുറിച്ചുള്ള ആധികാരികവും സമഗ്രവുമായ ഒരു ലേഖനമാണ് ഇത്. താത്പര്യമുള്ളവര്‍ക്കു വായിക്കാം.

'പൊതുമരാമത്തു വകുപ്പില്‍ തീവെട്ടിക്കൊള്ള' എന്ന പോസ്റ്റ് അങ്കിള്‍ എഴുതിയത് 2010 ജൂലായ 20 നാണ്. 'ധനം-കം-പൊതുമരാമത്ത് മന്ത്രി പൊതുമര ാമത്ത് വകുപ്പില്‍ തീവെട്ടിക്കൊള്ള നടന്നതായി കണ്ടുപിടിച്ചിരിക്കുന്നു. തന്റെ ഒരു പ്രസ്താവനയിലൂടെയാണു ഈ വെളിപ്പെടുത്തല്‍. പ്രസ്താവന പൊതു മരാമത്ത് വകുപ്പ് നേരിട്ട് നടത്തുന്ന ഒരു വെബ് ഗ്രൂപ്പിലാണു പ്രസിദ്ധീകരിച്ചിരിക്കുന്നത് . അതു കൊണ്ടുതന്നെ അതിന്റെ ആധികാരികത യില്‍ സംശയമില്ല. രണ്ട് പി.ഡി.എഫ് രേഖകളായാണു പ്രസിദ്ധീകരിച്ചിരിക്കു ന്നത്. ഏതായാലും ഞാന്‍ അതിന്റെ പകര്‍പ്പു ശേഖരിച്ചിട്ടുണ്ട്.' ബന്ധപ്പെട്ട സൈറ്റുകളുടെ ലിങ്കുകളടക്കം ആണ് എഴുതിയിരിക്കുന്നത്. നമ്മുടെ നികുതി പണം നാടിനോടും സമൂഹത്തോടും യാതൊരു പ്രതിബദ്ധതയുമില്ലാത്ത കുറേ പേര്‍ തുലച്ചു കളയുന്നതോര്‍ക്കുമ്പോള്‍ എന്റെ ചോരയും തിളയ്ക്കുന്നുണ്ട്. പക്ഷേ കിംഫലം?

പൊതുമരാമത്തുവകുപ്പും KSTP യും എന്ന ലേഖനം വായിച്ചാല്‍ സംസ്ഥാനഖജനാവില്‍ നിന്ന് 3 കോടിയോളം രൂപ പോയി കിട്ടിയതെങ്ങനെ എന്ന് അറിയാം.

'സ്മാര്‍ട്ട് സിറ്റി പദ്ധതി എന്തുകൊണ്ടിതുവരെ നടപ്പായില്ല' എന്ന ലേഖനം അങ്കിള്‍ എഴുതിയതു 2009 ഡിസംബര്‍ 19 നാണ്. അതിന്റെ ആദ്യ ചട്ടക്കൂടു കരാര്‍ ഒപ്പു വച്ചത് 2007 മെയ് 13നാണെന്നും ലേഖനത്തില്‍ പറയുന്നു. 4 വര്‍ഷം തികയാന്‍ ഇനി കഷ്ടി നാലു മാസം മാത്രം! നമ്മള്‍ എന്താ ഇങ്ങനെയായി പോയത്?യഥാ പ്രജാ, തഥാ രാജ, തിരിച്ചല്ല!

അഗതികളെ കണ്ടവരുണ്ടോ ആശ്രയം കൊടുക്കാന്‍, പണിതിട്ടും പണിതീരാത്ത പണികള്‍, പത്രപരസ്യങ്ങള്‍ സര്‍ക്കാര്‍ ചെലവില്‍, റോഡു നിര്‍മ്മാണം കരാറുകാര്‍ക്ക് ചാകര, ടാര്‍ കുംഭകോണം സി.എ.ജി പറഞ്ഞതും പറയാത്തതും , ആഡംബരനികുതി വെട്ടിപ്പ് എന്നു തുടങ്ങി എല്ലാ പോസ്റ്റുകളും പണം ചോരുന്ന വഴികള്‍ അറിയാന്‍ താല്‍പര്യമുള്ളവര്‍ക്ക് വായിച്ചറിയാം. വിവരാവകാശനിയമവും സര്‍ക്കാര്‍ സൈറ്റുകളും പ്രസിദ്ധീകരണങ്ങളും അധികരിച്ച് അങ്കിള്‍ എഴുതിയതൊന്നും ആര്‍ക്കും ചോദ്യം ചെയ്യാനാവില്ല.

ഉപഭോക്താവ് (http://upabhokthavu.blogspot.com/ )- പേരു സൂചിപ്പിക്കുന്നതു പോലെ ഉപഭോക്താവ് അറിയേണ്ടും കാര്യങ്ങള്‍ ആണ് ഈ ബ്ലോഗില്‍. എം.പി.മാരുടെ പുതുക്കിയ ശമ്പളം എന്ന പോസ്റ്റില്‍ അങ്കിള്‍ ഇങ്ങനെ ചോദിക്കുന്നു-' എന്തു പറയുന്നൂ, നമ്മളെ സേവിക്കാന്‍ ഈ തുക മതിയാകുമോ അവര്‍ക്ക്?' ' ഇത്രപോരാ അങ്കിളേ... ഇനി ഒരു വാക്കൌട്ട് അലവന്‍സ് കൂടി കൊടുക്കണം ' എന്ന് ഒരാളുടെ കമന്റുണ്ട്.

പുതിയ റേഷന്‍കാര്‍ഡ് ഓണ്‍ലൈനായി അപേക്ഷിക്കാം, ജനനമരണവിവാഹസര്‍ട്ടിഫിക്കറ്റുകള്‍, മൊബൈലിലെ പരസ്യ വിളികള്‍, നടപ്പാത-കാല്‍നടക്കാരുടെ അവകാശം തുടങ്ങി എല്ലാ പോസ്റ്റുകളും നമുക്ക് എപ്പോഴെങ്കിലും ആവശ്യം വരുന്നവയാണ്. വേണം നമുക്ക് സമൂഹത്തിനു വേണ്ടി കണ്‍തുറന്നിരിക്കുന്ന ഇത്തരം അങ്കിള്‍മാര്‍ . ശ്രീ. സി.പി. ചന്ദ്രകുമാറിന്റെ ആത്മാവിന് നിത്യ ശാന്തി ലഭിക്കട്ടെ!

മേരാ ഭാരത് മഹാന്‍ എന്ന ഫോര്‍വേഡഡ് മെസേജിന്റെ സ്വതന്ത്ര പരിഭാഷ-
'മുഴുവന്‍ ശരിയോ എന്നറിയില്ല, എങ്കിലും തീര്‍ച്ചയായും സത്യത്തില്‍ നിന്ന് വളരെയൊന്നും അകലെയാവില്ല.'ഇത് അജ്ഞാത രചയിതാവിന്റെ മുന്‍കൂര്‍ ജാമ്യം, എന്റേയും!

'ഇന്‍ഡ്യാക്കാര്‍ പാവപ്പെട്ടവരാണ്, പക്ഷേ ഇന്‍ഡ്യ പാവപ്പെട്ട രാജ്യമല്ല.30 വര്‍ഷത്തേയ്ക്ക് ഇന്‍ഡ്യാമഹാരാജ്യം ടാക്‌സ് ഫ്രീയാക്കാന്‍ തക്ക തുകയായ 280 ലക്ഷം കോടി(ആത്മന്‍-എന്റമ്മേ!) ഇന്‍ഡ്യന്‍ രൂപയാണ് സ്വിസ്സ് ബാങ്കിലുള്ളത്. ഇത്രയും പണം കൊണ്ട് 60 കോടി ഇന്‍ഡ്യാക്കാര്‍ക്ക് ജോലി നല്‍കാനാവും. ഓരോ പൗരനും 60 വര്‍ഷത്തേക്ക് 2000 രൂപാ നല്‍കാനാവും. വേള്‍ഡ് ബാങ്ക്, ഐ.എം.എഫ് ഇവയില്‍ നിന്ന് രാജ്യം കടം കൊള്ളേണ്ടി വരില്ല. ആലോചിച്ചു നോക്കൂ, അഴിമതിക്കാര്‍ നമ്മുടെ പണം എങ്ങനെ ദുരുപയോഗപ്പെടുത്തുന്നുവെന്ന്!അഴിമതിക്കെതിരെ ശബ്ദിക്കാന്‍ നമുക്ക് അവകാശമുണ്ട്.'

 

ശരീരമാദ്യം.....

 (Online link -published 29.01.2011)
നാഡി പിടിച്ചു നോക്കി രോഗം നിര്‍ണ്ണയിച്ചിരുന്ന ജീവന്‍ മശായിയെ ഓര്‍മ്മയില്ലേ? താരാശങ്കര്‍ ബാനര്‍ജിയുടെ ആരോഗ്യനികേതനത്തിലെ ജീവന്‍ മശായിയെ? ടെസ്റ്റുകളൊന്നും ചെയ്യാതെ തന്നെ, പിഴയ്ക്കാത്ത രോഗനിര്‍ണ്ണയം നടത്തിയിരുന്ന ധാരാളം വൈദ്യശിരോമണികള്‍ ഇവിടെയും ഉണ്ടായിരുന്നു. തിരുവനന്തപുരത്ത് ഡോ. കെ.എന്‍.പൈ അങ്ങനെയായിരുന്നു എന്നു കേട്ടിട്ടുണ്ട്.

ഇന്നിപ്പോള്‍ കാലം ഏറെ മാറിപ്പോയി, നമ്മളും . ഡോക്ടര്‍ ഒരു പത്ത് ടെസ്റ്റെങ്കിലും എഴുതിയില്ലെങ്കില്‍ രോഗിക്ക് ഇഷ്ടപ്പെടില്ല. അങ്ങനെ ചെയ്തില്ലെങ്കില്‍ ' ഓ, ഇയാള്‍ക്കൊന്നും അറിയില്ല ' എന്നാവും രോഗിയുടെ വിലയിരുത്തല്‍. ചുരുക്കത്തില്‍ നവംബറിന്റെ നഷ്ടത്തില്‍ പത്മരാജന്റെ നായിക പറഞ്ഞതു പോലെ 'കണ്ണുനീരും വിയര്‍പ്പും' ഒഴിച്ചുള്ള എല്ലാം ടെസ്റ്റു ചെയ്താലേ നമുക്കു സമാധാനമുള്ളു. അങ്ങനെ രോഗികളുടേയും കൂടി അനുഗ്രഹാശിസ്സുകളോടെ ചികിത്സാവ്യവസായം തഴച്ചു വളരുന്നു.

'ശരീരമാദ്യം ഖലു ധര്‍മ്മസാധനം' എന്നാണല്ലോ. നമ്മള്‍ ആരോഗ്യകാര്യങ്ങളില്‍ ഇത്തിരി ശ്രദ്ധ വച്ചേ മതിയാവൂ. നമുക്കു വേണ്ടിയും മറ്റുള്ളവര്‍ നമുക്കു വേണ്ടി ബുദ്ധിമുട്ടാതിരിക്കാന്‍ വേണ്ടിയും. രോഗലക്ഷണം തോന്നിയാല്‍ ആസ്പത്രിയിലേക്കോടും മുമ്പ്് നമുക്കു തന്നെ അതെ കുറിച്ചൊന്ന് അവലോകനം നടത്താം. തിരക്കു കാരണം ആശുപത്രിയിലായാലും വീട്ടിലായാലും ഒരു രോഗിക്കു വേണ്ടി ചെലവാക്കാന്‍ ഡോക്ടര്‍ക്കു വളരെ കുറഞ്ഞ സമയമേ ഉള്ളു. അതിനാല്‍ നമ്മള്‍ തന്നെ കാര്യങ്ങള്‍ മനസ്സിലാക്കി പോയാല്‍ ആ കുറഞ്ഞ സമയം ഏറ്റവും ഉപയോഗപ്രദമാക്കി മാറ്റാം.

ലക്ഷണങ്ങള്‍ വച്ച് രോഗനിര്‍ണ്ണയം സഹായിക്കുന്ന സൈറ്റുകള്‍ ഏറെയുണ്ട്. അവയില്‍ വളരെ നന്നെന്നു തോന്നിയ ഒന്നാണ് മായോ ക്ലിനിക്കിന്റെ സിംപ്റ്റം ചെക്കര്‍- http://www.mayoclinic.com/health/symptom-checker/DS00671. കുട്ടികള്‍ക്കും പ്രായപൂര്‍ത്തി ആയവര്‍ക്കും പ്രത്യേകം ലക്ഷണങ്ങള്‍ കൊടുത്തിട്ടുണ്ട്. അതില്‍ നിന്ന് പ്രൈമറി ലക്ഷണം തെരഞ്ഞെടുത്താല്‍ പിന്നെ വിശദമായ ലിസ്റ്റ് വീണ്ടും കിട്ടും. അതിലും കൃത്യമായി ടിക് ചെയ്തിട്ട് കാരണം കണ്ടുപിടിക്കുക എന്ന് തിരഞ്ഞാല്‍ ബന്ധപ്പെട്ട രോഗങ്ങളുടെ ലിസ്റ്റ് കിട്ടും.
ഒന്നിലധികം രോഗലക്ഷണങ്ങള്‍ കാണുമല്ലോ സാധാരണഗതിയില്‍. അതിനാല്‍ കുറച്ചു ക്ഷമ വേണ്ട ഏര്‍പ്പാടിണിത്, പ്രത്യേകിച്ച് ആദ്യം ഉപയോഗിക്കുമ്പോള്‍. എങ്കിലും വളരെ ഉപകാരപ്രദം.

ഇനി നമുക്ക് അസുഖത്തെപ്പറ്റി ഏകദേശം രൂപമുണ്ടെങ്കില്‍ അങ്ങനേയും തിരയാം. ഇപ്പോള്‍ ആരോഗ്യമാസികകളും ടി.വി. പരിപാടികളും എല്ലാം കണ്ട്് എല്ലാവരും ആരോഗ്യ/രോഗ കാര്യങ്ങളില്‍ വളരെ അറിവുള്ളവരാണല്ലോ. അതിനാല്‍ http://www.mayoclinic.com/health/DiseasesIndex/DiseasesIndex എന്ന പേജില്‍ പോയാല്‍ ഉണ്ടെന്നു സംശയിക്കുന്ന രോഗത്തെക്കുറിച്ച് കൂടുതല്‍ സൂഷ്മമായി മനസ്സിലാക്കാനാവും. ഇത്തരം സൈറ്റുകള്‍ ആവശ്യം വരുമ്പോള്‍ മാത്രം ഉപയോഗിക്കേണ്ടവയാണ്. ഇല്ലെങ്കില്‍ അതു സ്വയം പാരയായി മാറാം. അതിനാല്‍ ജാഗ്രതൈ! http://www.webmd.com/ ല്‍ ആരോഗ്യപരമായ ഭക്ഷണക്രമം സ്ലൈഡ് ഷോ ആയി കാണാം.

വാതപിത്തകഫങ്ങളുടെ അസന്തുലിതാവസ്ഥയാണ് രോഗാവസ്ഥയ്ക്കു കാരണം എന്നു പറയുന്ന ആയുര്‍വേദ രീതിയെ പറ്റി സൈറ്റുകള്‍ ധാരാളമുണ്ട്, എന്നാല്‍ അതിലൊന്നും സിംപ്റ്റം ചെക്കര്‍ കണ്ടില്ല. ചികിത്സാരീതി വ്യത്യസ്ഥമായതിനാലാവാം.

ആരോഗ്യപുഷ്ടിക്കായി ഇനി അല്‍പ്പം ചിരിക്കാമല്ലേ? എ ഫോര്‍ ആപ്പിള്‍, ബി ഫോര്‍ ബോയ്്ക്കു പകരം മലയാളിയുടെ തനതായ അക്ഷരമാലാക്രമം കാണുക. http://keralites.net/ എന്ന സൈറ്റില്‍ നിന്ന് പല കൈമറിഞ്ഞുവന്ന മെയിലില്‍ നിന്ന്-

A-Adipoli (അര്‍മ്മാദം എന്നുമാവാം എന്ന് എന്റെ ഭാഷ്യം)

B-Bandh-കേരളത്തില്‍ ഏറ്റവും കൊണ്ടാടപ്പെടുന്ന ആഘോഷം, മാസത്തില്‍, ആഴ്ച്ചയില്‍ , വേണമെങ്കില്‍ ദിവസേനയും ആകാം.!

C-Coconut Oil- മല്ലുവിന്റെ തലമുടിയിലും, ദേ ഇപ്പോള്‍ കഴിച്ചുകൊണ്ടിരിക്കുന്ന ആ പഴംപൊരിയില്ലേ, അതിലും സുലഭമായി കാണുന്ന സാധനം!
D-Dasettan ; E-Elephant- ആനയില്ലാതെ മലയാളിക്കെന്താഘോഷം!
G-Gold -വില എത്രയോ കൂടട്ടെ, മലയാളി പെണ്ണിന് ഏറ്റവും പ്രിയം ഇതാണ്. അതു ഗ്രാമുകള്‍ പോരാ, കിലോകള്‍ തന്നെ വേണം താനും!
L-Lungi-മലയാളത്താന്മാരുടെ പ്രിയ വേഷം!ലുങ്കി ഉടുത്തു വാ, കിറ്റെക്‌സ് ലുങ്കി ഉടുത്തു വാ!
M- Mohanlal, Mammootty-മലയാളം സിനിമയിലെ കിരീടമണിയാത്ത താരരാജാക്കന്മാര്‍!
P-Private Bus- ഉണ്ണികൃഷ്ണന്‍ മുതല്‍ സെന്റ് പാട്രിക് വരെ പേരുകളില്‍ കേരളത്തില്‍ ഇവ തലങ്ങും വിലങ്ങും ഓടുന്നു.
Q-Quotation team
R-Reality show
S- Scandals- മലയാളിയുടെ മാനസികോല്ലാസത്തിന്റെ വഴി,അല്ലെങ്കില്‍ മലയാളിയുടെ പ്രിയതരമായ പരദൂഷണം.
V- Venad Express- മലയാളിയുടെ സ്വന്തം ട്രെയിന്‍!

ശരിയല്ലേ ഇതെല്ലാം?

വിക്കി മാഹാത്മ്യം

(Online link-published 22.01.2011)
അറിവുകള്‍ പങ്കു വയ്ക്കപ്പെടേണ്ടവയാണ്, അല്ലെങ്കില്‍ പങ്കുവയ്ക്കപ്പെടുമ്പോള്‍ മാത്രമേ അത് യഥാര്‍ത്ഥ അറിവ് ആകുന്നുള്ളു. എന്‍സൈക്ലോപ്പീഡിയ ബ്രിട്ടാനിക്ക, അമേരിക്കാന തുടങ്ങിയ വിലകൂടിയ വിശ്വവിജ്ഞാനകോശങ്ങള്‍ , മലയാളത്തില്‍ പ്രസിദ്ധീകരിക്കപ്പെട്ട സര്‍വ്വവിജ്ഞാനകോശം ഇവയ്‌ക്കെല്ലാം ശേഷം ഇതാ നമ്മുടെ കൈയ്യെത്തും ദൂരത്ത് ഒരു മൗസ് ക്ലിക്കകലത്തില്‍ സ്വതന്ത്ര ഓണ്‍ലൈന്‍ വിജ്ഞാനകോശമായ വിക്കിപീഡിയ. അതിന്റെ മലയാള ഭാഷാ പതിപ്പായ വിക്കിപീഡിയ മലയാളം എന്ന മഹത് സംരംഭത്തെപ്പറ്റി അല്‍പ്പം.

2001 ജനുവരി 15 നു വിക്കി മീഡിയ ഫൗണ്ടേഷന്‍ തുടക്കമിട്ട 'വിക്കിപീഡിയ' എന്ന സ്വതന്ത്രവിജ്ഞാനകോശം ജനുവരി 2010 വരെ 270 ഭാഷകളില്‍ ഓണ്‍ലൈനില്‍ പ്രസിദ്ധീകരിക്കപ്പെട്ടു കഴിഞ്ഞുവെന്ന് വിക്കി സൈറ്റ് പറയുന്നു.

മലയാളം വിക്കിയില്‍ നിന്നു അതിന്റെ ചരിത്രം, ഉദ്ദേശലക്ഷ്യം എന്നിവയെപ്പറ്റി - '2002 ഡിസംബര്‍ 21 നു അക്കാലത്ത് അമേരിക്കന്‍ സര്‍വ്വകലാശാലയില്‍ ഗവേഷണ വിദ്യാര്‍ത്ഥിയായ തിരുവനന്തപുരം സ്വദേശി വിനോദ് മേനോന്‍ എം.പി യാണ് മലയാളം വിക്കിപീഡിയ ഇപ്പോഴുള്ള യൂ.ആര്‍.എല്‍ ആയ http://ml.wikipedia.org/ ലേക്ക് മാറ്റാനും അത് സജീവമാക്കാനുമുള്ള പ്രയത്‌നങ്ങള്‍ക്കും തുടക്കമിട്ടത്'

'അറിവു പങ്കു വെക്കുക എന്ന ലക്ഷ്യത്തോടെ, ഉയര്‍ന്ന ഗുണമേന്മയുള്ള വിജ്ഞാനകോശം സൃഷ്ടിക്കണമെന്ന് ആഗ്രഹിക്കുന്ന, പരസ്പരബഹുമാനവും , വിജ്ഞാനതൃഷ്ണയുമുള്ള ഓണ്‍ലൈന്‍ സമൂഹമാണ് വിക്കീപീഡിയയുടെ പിന്നില്‍ പ്രവര്‍ത്തിക്കുന്നത്.'

അച്ചടിച്ച വിജ്ഞാനകോശത്തില്‍ നിന്ന്് നമുക്കു വേണ്ട വിഷയം കണ്ടുപിടിക്കുന്നതിനേക്കാള്‍ എത്രയും എളുപ്പമാണ് ഓണ്‍ലൈനായി അതു ചെയ്യുന്നത്. അതുകൊണ്ട് പഠിതാക്കള്‍ക്കും മറ്റു വായനക്കാര്‍ക്കും സമയവും പ്രയത്‌നവും ഏറെ ലാഭം.ഇതുവരെ വിക്കി മലയാളത്തില്‍ 16269 സചിത്രലേഖനങ്ങള്‍ ഉണ്ട്. അച്ചടി പതിപ്പു പോലെ പേജുകളുടെ എണ്ണത്തെപ്പറ്റി വിഷമിക്കേണ്ട കാര്യമില്ലാത്തതിനാല്‍ എത്ര വേണമെങ്കിലും എഴുതാം, മൗസ് സ്‌ക്രോള്‍ ചെയ്താല്‍ മതിയല്ലോ.

വിക്കിയില്‍ ആര്‍ക്കും പങ്കാളിയാകാം. ഒരാള്‍ ഒരു ലേഖനം എഴുതി ആദ്യം ഇട്ടെന്നിരിക്കിട്ടെ. അതു ശൈശവദശയിലുള്ള ഒന്നാവാം. വായിക്കുന്നവര്‍ക്ക് അതിലെ തെറ്റു തിരുത്താം, കൂടുതല്‍ കൂട്ടി ചേര്‍ത്ത് അതിനെ ആധികാരികമാക്കാം. സൈറ്റില്‍ ലോഗിന്‍ ചെയ്യണം, വിക്കിയുടെ നിയമാവലി അനുസരിച്ചാവണം എഴുതുന്നത്് എന്നു മാത്രം.

എന്തൊക്ക തരം ലേഖനം ആവാം എന്നറിയണ്ടേ? ' വിജ്ഞാനപ്രദമായ ഏതു ചെറുവിഷയത്തെയും വിക്കി സ്വാഗതം ചെയ്യുന്നു. ഒരു ഉദാഹരണമെടു ത്താല്‍, മലയാളത്തില്‍ പ്രസിദ്ധീകൃതമായ ചെറുതും വലുതുമായ വിജ്ഞാനകോശങ്ങളിലൊന്നും ഒരുപക്ഷേ കുട്ടിയും കോലും എന്ന കളിയെക്കുറിച്ച് ഒരു ലേഖനം കണ്ടേക്കില്ല. വളരെ നിസാരമെന്നു തോന്നാവുന്ന ഈ വിഷയത്തെക്കുറിച്ചും അറിയാന്‍ താല്‍്പര്യമുള്ളവര്‍ കാണും എന്നതില്‍ സംശയമില്ലല്ലോ. മലയാളം വിക്കിപീഡിയയില്‍ ഏറ്റവും താല്പര്യത്തോടെ തിരുത്തപ്പെടുന്ന ലേഖനങ്ങളിലൊന്നാണിത്.'

വിക്കി നിഘണ്ഡു, വിക്കി ചൊല്ലുകള്‍, വിക്കി ഗ്രന്ഥശാല, വിക്കി പാഠശാല , വിക്കി സര്‍വ്വകലാശാല എന്നിവയാണ് വിക്കി മലയാളത്തിന്റെ മറ്റു സംരംഭങ്ങള്‍.
വിക്കി ചൊല്ലുകളുടെ മുഖവുരയില്‍ നിന്ന്-'നിങ്ങള്‍ ഒരു മലയാളിയാണെങ്കില്‍, നിങ്ങളുടെ ഓര്‍മ്മയിലുള്ള പഴഞ്ചൊല്ലുകള്‍ ഇവിടെ രേഖപ്പെടുത്തുക. അപ്പൂപ്പനോടും അമ്മൂമ്മയോടും ചോദിച്ച് അവരുടെ ഓര്‍മ്മയിലുള്ളതും കൂടി ഉള്‍പ്പെടുത്തുക. പുതുലോകത്തിനു പഠിക്കുവാനും നാളേക്കു വേണ്ടി സൂക്ഷിച്ചു വെക്കുവാനും വേണ്ടിയുള്ള ഈ സംരംഭത്തില്‍ പങ്കാളിയാവുക..' പഴഞ്ചൊല്ലുകള്‍ മാത്രമല്ല, മഹദ്വചനങ്ങള്‍, പുസ്തക ഉദ്ധരിണികള്‍ തുടങ്ങിയവയും ഉണ്ട് .അക്ഷരമാലാക്രമത്തിലോ വിഷയക്രമത്തിലോ, (ഉദാ-കൃഷിചൊല്ലുകള്‍, ഓണചൊല്ലുകള്‍, കവിവാക്യങ്ങള്‍) ആവശ്യാനുസരണം, വായിക്കാം, പ്രയോഗിക്കാം.

വിക്കി ഗ്രന്ഥശാലയിലേക്ക്-'കഴിഞ്ഞകാലത്തെ അമൂല്യഗ്രന്ഥങ്ങളുടെ ശേഖരമാണിത്്. പകര്‍പ്പവകാശപരിധിയില്‍ വരാത്ത പ്രാചീനകൃതികള്‍, പകര്‍പ്പവകാശകാലാവധി കഴിഞ്ഞ കൃതികള്‍, പൊതുസഞ്ചയത്തില്‍പ്പെട്ട ഔദ്യോഗികപ്രമാണങ്ങള്‍ എന്നിങ്ങനെ മൂന്നു തരം കൃതികള്‍ ആണു വിക്കിഗ്രന്ഥശാലയില്‍ ലഭ്യമാകുക. ' എഴുത്തച്ഛന്‍-ചെറുശ്ശേരി-കുഞ്ചന്‍ നമ്പ്യാര്‍-കുമാരനാശാന്‍ കൃതികള്‍, ഗുരുദേവന്റെ സമ്പൂര്‍ണ്ണകൃതികള്‍, എ.ആര്‍.രാജരാജവര്‍മ്മയുടെ കേരളപാണിനീയം ,ഇന്ദുലേഖ, കുന്ദലത, മാര്‍ത്താണ്ഡവര്‍മ്മ , കൂടാതെ നോവലുകള്‍ നാടകം, ചെറുകഥ, എല്ലാം വിക്കി e-ലൈബ്രറിയില്‍ കിട്ടും. അറിവിലേക്കുള്ള കിളിവാതിലിന്റെ താക്കോല്‍ ഇതാ- http://ml.wikisource.org/wiki/.

മറ്റു വിക്കിസംരംഭങ്ങളും എന്താണെന്നു സൈറ്റു നോക്കി മനസ്സിലാക്കാം. കൂടുതല്‍ പേരേ ഈ മഹത് സംരംഭങ്ങളില്‍ പങ്കാളികളാക്കുന്നതിനായി വിക്കി സെമിനാറുകള്‍ സംഘടിപ്പിക്കാറുണ്ട്. കണ്ണൂരില്‍ ജനുവരി 15നു പഠനശിബിരമുണ്ട്.

അറിയുക, ലാഭേച്ഛയേതുമില്ലാതെ അന്യര്‍ക്കു വേണ്ടി, ഭാവി തലമുറയ്ക്കു വേണ്ടി പ്രവര്‍ത്തിക്കുന്ന ഒരു വിക്കി മലയാളി സമൂഹമുണ്ടിവിടെ! അതില്‍ പങ്കാളിത്തം വേണ്ടേ നമുക്കും ?