Friday, October 7, 2011

വിശ്രാന്തി

Online link of weekly page 

ശരണാലയം എന്ന വാക്ക് മലയാളിക്കു പരിചയപ്പെടുത്തിയത് 'തിങ്കളാഴ്ച്ച നല്ല ദിവസം' എന്ന പത്മരാജന്‍ സിനിമയാവണം. മാതാപിതാക്കളെ അങ്ങനെ കൈവിടരുത് എന്ന സന്ദേശമാണ് സിനിമ നല്‍കിയത്. പക്ഷേ കരുണ, സ്വാന്തന, വിശ്രാന്തി, തുടങ്ങിയ വശ്യമോഹന പേരുകളില്‍  അത്തരം ആലയങ്ങള്‍ പെരുകുന്നു ഇവിടെ. കാരണം, കാലം മാറുകയാണ്, നമ്മളും.


' സ്വാഗതം മകനേ, നന്നായിരിക്കൂ-അമ്മ' (Welcome my son, do well-Amma ) എന്ന കുറിപ്പു ബാക്കിയാക്കി, ഗാന്ധിജിവീട്ടിലെ മരുമകള്‍ ശ്രീമതി സരസ്വതീഗാന്ധി യാത്രയായത്് മറക്കാറായിട്ടില്ല. യുഎസില്‍ താമസക്കാരായ മക്കള്‍ ഗാന്ധിമാര്‍ അമ്മ മരിച്ചിട്ടു പോലും എത്തിയില്ല എന്നതല്ല, മറിച്ച് ജീവിച്ചിരിക്കെ, അമ്മ വല്ലാതെ ആഗ്രഹിച്ചിട്ടും വന്നില്ല എന്നതായിരുന്നു എന്നെ സ്പര്‍ശിച്ചത്. മരണാനന്തരം, വികാരവിചാരങ്ങള്‍ നശിച്ചു കഴിഞ്ഞ്, വന്നാലെന്ത്, വന്നില്ലെങ്കിലെന്ത് ?

തിരു:ജനറല്‍ ആസ്പത്രിയിലെ 9-ാം വാര്‍ഡുകാര്‍, മക്കള്‍ നിര്‍ദ്ദയം കൈവിട്ട അച്ഛനമ്മമാര്‍, അധികവും അമ്മമാര്‍, ഇവരെപ്പറ്റി വായിച്ചതും മറക്കുവതെങ്ങ നെ? പട്ടിണിയാവാം 9-ാം വാര്‍ഡില്‍ അംഗസംഖ്യ കൂട്ടിയത്. പക്ഷേ മറ്റുള്ളിട ത്ത് പണമായിരുന്നില്ല പ്രശ്‌നം, മനഃസ്ഥിതി ആയിരുന്നു. മനുഷ്യപ്പറ്റില്ലാത്തവരായി ആ മക്കള്‍ മാറിയതെങ്ങനെ? വളര്‍ത്തുദോഷം? കാലത്തിന്റെ മാറ്റം എന്ന  ത്രോ എവേ (ദൂരെ എറിഞ്ഞു കളയുക) സംസ്‌ക്കാരം? എല്ലാം കൂടി ?

പല വീടുകളിലും ഒരു വെടിക്കുള്ള മരുന്ന് മുതിര്‍ന്നവരുടെ കയ്യിലുണ്ടാവും. അവര്‍ മക്കളുടെ ജീവിതം ദുസ്സഹമാക്കും. മക്കളാണെങ്കിലോ? എല്ലാ മക്കളും സഹകരിച്ചാല്‍ കാര്യങ്ങള്‍ ഭംഗയായി നീങ്ങും. പക്ഷേ ചുമതലകളില്‍ നിന്നു സൂത്രത്തില്‍ ഒഴിഞ്ഞു മാറും മിയ്ക്കവരും. പരസ്പരം താങ്ങാവുന്നവരും ധാരാളം. പറഞ്ഞുവന്നത് ,മുന്‍തലമുറ മുഴുവന്‍ ദേവകളല്ല, മക്കള്‍തലമുറ മുഴുവനും ദുഷ്ടരുമല്ല.

ഒറ്റയ്ക്കു താമസം വയ്യ എന്ന് ശരണാലയത്തില്‍ പോയി സന്തോഷമായിരിക്കുന്നവരുണ്ട്. വയോജനങ്ങള്‍ക്കായി പ്രവര്‍ത്തിക്കുന്ന ഹെല്‍പ്പ് ഏജ് ഇന്‍ഡ്യ 267 ശരണാലയങ്ങളും 135 പകല്‍വീടുകളും നടത്തുന്നു. കൂടുതല്‍ അറിയാന്‍ ,കാണുക,  http://www.helpageindia.org/ .

പകല്‍വീടുകള്‍ നല്ലൊരു ആശയമാണ്. കൂട്ടുകുടുംബങ്ങള്‍ ഇന്നില്ല. മിയ്ക്ക വീടുകളിലും പകല്‍ ആളില്ല. വിശ്വസ്തയായ ഹോം നഴ്‌സും വീട്ടുസഹായി യും കിട്ടാക്കനി. ഇവിടെയേ്രത ശരണാലയങ്ങളുടേയും പകല്‍ വീടുകളുടേയും  പ്രസക്തി. മനം മടുപ്പിക്കുന്ന ഏകാന്തത ഇല്ല, സമപ്രായക്കാരുടെ ചങ്ങാത്തവും കിട്ടും. അച്ഛനമ്മമാരെ കുളിപ്പിച്ചു യൂണിഫോമിടീച്ച് ബാഗും വാട്ടര്‍ബോട്ടിലുമായി സ്‌കൂള്‍ വാനില്‍ കയറ്റിവിടുന്നതായി അഷ്ടമൂര്‍ത്തിയുടെ രസകരമായ ഒരു കഥയുണ്ട്. കഥപ്പേര് മറന്നു. നമ്മളെ ഇങ്ങനെ സ്‌കൂളില്‍ ഒരുക്കി വിടാനായ് ആളു വേണ്ടേ എന്ന് മകന്‍ ഭാര്യയോടു ചോദിക്കുന്നിടത്താണ് കഥ അവസാനിക്കുന്നത് എന്ന് ഓര്‍മ്മ.

ശരണാലയങ്ങളിലെ ഹോസ്റ്റല്‍ പോലുള്ള ഒറ്റമുറിവാസം പക്ഷേ ദുസ്സഹമാ ണ്. രോഗാവശതകള്‍ ബാധിച്ച് അവിടെ കഴിയുന്നതു ഏറ്റം പരിതാപകരം. ഉപേക്ഷിക്കപ്പെട്ടവര്‍ എന്ന തോന്നലുണ്ടാകും അവര്‍ക്ക്. പുറം നാടുകളില്‍ റിട്ടയര്‍മെന്റ് പ്രോപ്പര്‍ട്ടീസ് ഉള്ളതു പോലെ സമൂഹജീവനകേന്ദ്രങ്ങള്‍-Community living centre- ആണ് അതിനു പരിഹാരം. അടുത്തടുത്തായി എല്ലാ സൗകര്യങ്ങളുമുള്ള കൊച്ചു വീടുകള്‍.  വീടിന്റെ അന്തരീക്ഷവും സമൂഹജീവിതവും സാദ്ധ്യമാകുന്നു ഇവിടെ. ബംഗലുരുവിലെ സുശാന്തി ഇത്തരം ഒന്നാണ്. കയ്യില്‍ പുത്തനുള്ളവര്‍ക്ക് http://www.sukhshanthi.com/  ഒന്നു പരീക്ഷിക്കാവുന്നതാണ്. കാശുണ്ടാവട്ടെ, ഞാനും വാങ്ങും ഒന്ന്, കുടുംബക്കല്ലറ പോലെ, എല്ലാ തലമുറകള്‍ക്കുമായി ഒരു കുടുംബശരണാലയം!

ഒക്ടോബര്‍ ഒന്ന് വയോജനങ്ങളുടെ ദിനം. അവര്‍ ബാദ്ധ്യതയല്ല, ആസ്തിയാണ് എന്ന് സര്‍ക്കാര്‍ അവരെ രാജ്യത്തിന്റെ അതിഥികളായി പ്രഖാപിക്കുന്ന ദിനം സ്വപ്‌നം കാണാം നമുക്ക്. ശരണാലയം എന്ന് ആവര്‍ത്തിച്ചത് ക്ഷമിക്കുക. വൃദ്ധസദനം, അഗതിമന്ദിരം തുടങ്ങിയ പേരുകള്‍ അരോചകമത്രേ. ടിവിയില്‍ ചിലപ്പോള്‍ കണ്ടിട്ടുണ്ട്, ഇവിടെ ഇത്ര അനാഥരുണ്ട്് എന്നും മറ്റും പറയുന്നത്. അവര്‍ കേള്‍ക്കെ അങ്ങനെ ലേബല്‍ ചെയ്യുന്നത് തെറ്റല്ലേ? .

സരസ്വതീ നമസ്തുഭ്യം...

തലമുറകള്‍ അവിടെ നില്‍ക്കട്ടെ. ഇന്ന് കുരുന്നുകള്‍ അക്ഷരപ്പടി കയറും ദിനത്തില്‍ ഒരു കളരിക്കഥ. നാട്ടിലെല്ലാം ആശാന്‍ പള്ളിക്കൂടം നിന്നപ്പോഴും ഗൗരിയുടെ വീടിനടുത്ത് ഒരു ആശാട്ടി കളരി നടത്തിയിരുന്നു. അച്ഛനമ്മാര്‍ ആവേശത്തോടെ അവളെ അവിടെ മണലിലെഴുതി പഠിക്കാനും വിട്ടു. അങ്ങ നെ ഗൗരി എഴുത്തും വായനയും വളരെ നേരത്തേ പഠിച്ചു.

അമ്പലത്തില്‍ വച്ചൊരു കല്യാണം. ഗൗരിക്ക് വെടിക്കെട്ടു ഭയമാണ്. പടക്കം  കേട്ട് ഗൗരിയുടെ വല്യമ്മ അവളെയെടുത്ത് ഓടി പടിഞ്ഞാറേ നടയിലേക്ക്. വല്യമ്മയുടെ തോളില്‍ തല പുറകോട്ടിട്ട് ഏങ്ങലടിച്ച് പേടിച്ചരണ്ടു  കിടക്കയാണ് കക്ഷി. ഓ, ഇനിയിപ്പോള്‍ കുഴപ്പമില്ല എന്ന് വല്യമ്മ സമാധാനിക്കെ പെട്ടെന്നു തലപൊക്കി ദൂരേയ്ക്കു കൈ ചൂണ്ടി ഗൗരി ചിണുങ്ങി. നോക്കിയ പ്പോള്‍ അവിടെ വെണ്ടയ്ക്കായില്‍ എഴുതി വച്ചിരിക്കുന്നു 'വെടി '!.

ഇത്തിരിക്കൊച്ചിനെ അക്ഷരം പഠിപ്പിച്ചുവച്ചിരിക്കുന്നു അവള്‍, അവള്‍ടെ ഒരു ആശാട്ടിപ്പള്ളിക്കുടം...അനിയത്തിയെ വഴക്കു പറഞ്ഞ് സാരമില്ല, സാരമില്ലെ  ന്നു കുട്ടിയുടെ പുറത്തു തട്ടി വല്യമ്മ ഓടി വടക്കേ നടയിലേക്ക്.....


8 comments:

  1. ശരണാലയം എന്ന വാക്കുതന്നെ എന്തോ ദു:ഖം തരുന്നു. അതു പോട്ടെ അല്ലേ? ഈ കുഞ്ഞുങ്ങളെ വേണ്ടാത്തതൊക്കെ പഠിപ്പിച്ച് ... അതു കൊള്ളാം.

    ReplyDelete
  2. ശ്രീ, ശ്ശി കാലമായല്ലോ കണ്ടിട്ട്. പിള്ളേച്ചന്‍ വായിച്ചിരുന്നു കേട്ടോ.

    ശ്രീനാഥന്‍-അതെ, ശരണാലയവും ഒരു നൊമ്പരവാക്കു തന്നെ, പക്ഷേ വൃദ്ധസദനത്തേക്കാള്‍ ഭേദം എന്നെഴുതിയതാണ്. വേറെ വാക്കൊന്നും കിട്ടിയില്ല.

    ReplyDelete
  3. ശരണാലയത്തിന്റെ വേദനകൾ പറഞ്ഞ് ഒടുവിലൊരു തമാശയിലെത്തിച്ച് മനസ് കുളിർപ്പിച്ചു.. :)

    ReplyDelete
  4. ശരണാലയം എന്ന വാക്ക് അതിന് മുന്‍പേ കെ.സുരേന്ദ്രന്റെ കരുണാലയത്തില്‍ ഇല്ലേ ചേച്ചി?

    ReplyDelete
  5. Tks Sita and Mano. I dnt rembr karunalayam, Mano.I had thought of naming it Sneha theeram /sneha veedu etc, but i felt it wud b a misnomer.:):)

    ReplyDelete
  6. ഇതാണല്ലേ ആ പോസ്റ്റ്?

    ReplyDelete
  7. Echmu- yes, and the one of sept 30th too.

    ReplyDelete